தஞ்சையில் ஏப். 13-இல் ஐஜேகே ஆர்ப்பாட்டம்

காவிரி மேலாண்மை வாரியம் அமைக்கக்கோரி, இந்திய ஜனநாயகக் கட்சி சார்பில் (ஐஜேகே) சார்பில் தஞ்சையில் ஏப்ரல் 13 ஆம் தேதி ஆர்ப்பாட்டம் நடைபெறும் என அதன் நிறுவனத் தலைவர் பாரிவேந்தர் தெரிவித்தார்.
அரியலூரில் புதன்கிழமை நடைபெற்ற நிகழ்ச்சியில் பங்கேற்க வந்த அவர், செய்தியாளர்களுக்கு அளித்த பேட்டி: 
காவிரி மேலாண்மை வாரியம் அமைக்க வேண்டும் என அனைத்துக்  கட்சிகளும் மத்திய அரசுக்கு அழுத்தம் கொடுத்து வருகின்றன. இந்த அழுத்தம் தமிழ்நாட்டின் வாழ்வாதாரத்திற்கான போராட்டம். காவிரி விவசாயத்துக்கும், 11 மாவட்ட மக்களின் குடிநீருக்கும் பயன்படுகின்றது. 25 லட்சம் ஏக்கர் காவிரியை நம்பியுள்ளது. முன்பு 3 போக விவசாயம் பார்த்த நிலையில், தற்போது ஒருபோகத்துக்கே வழியில்லை. முன்பு இந்தி எதிர்ப்புப் போராட்டத்தில் ஈடுபட்டதுபோல் தற்போது காவிரிக்காக அனைவரும் போராடி வருகின்றனர்.
மத்திய அரசு கர்நாடக தேர்தலுக்காக காவிரி மேலாண்மை வாரியம் அமைப்பதில் காலம் தாழ்த்தி வருகின்றது. மேலும், காவிரி மேலாண்மை வாரியத்தை அமைக்க வலியுறுத்தி, வரும் 13 ஆம் தேதி தஞ்சையில் தனது தலைமையில் ஆர்ப்பாட்டம் நடைபெறுவதாகத் தெரிவித்தார்.