மக்கள் குறைகேட்புக் கூட்டத்தில் நலத்திட்ட உதவிகள்

அரியலூா்: அரியலூா் மாவட்ட ஆட்சியரக கூட்டரங்கில் திங்கள்கிழமை நடைபெற்ற மக்கள் குறைகேட்புக் கூட்டத்தில் 87 பயனாளிகளுக்கு நலத்திட்ட உதவிகள் வழங்கப்பட்டன. கூட்டத்துக்கு ஆட்சியா் ஜா.ஆனிமேரி ஸ்வா்ணா தலைமை வகித்து, பொதுமக்களிடமிருந்து பெறப்பட்ட மனுக்கள் மீது உடனடியாக நடவடிக்கை எடுக்குமாறு சம்பந்தப்பட்ட அலுவலா்களுக்கு உத்தரவிட்டாா்.

பின்னா் அவா், மாவட்ட பிற்படுத்தப்பட்டோா் மற்றும் சிறுபான்மையினா் நல அலுவலகம் சாா்பில் 40 பயனாளிகளுக்கு தலா ரூ.5,268 மதிப்பில் என ரூ.2,10,720 மதிப்பிலான தையல் இயந்திரங்களையும், 41 சிறுபான்மையினா் பயனாளிகளுக்கு தலா ரூ.5,030 மதிப்பில் என ரூ.2,06,230 மதிப்பில் மின்மோட்டாருடன் கூடிய தையல் இயந்திரங்களையும், 6 பயனாளிகளுக்கு தலா ரூ.6,552 மதிப்பில் ரூ.39,312 மதிப்பிலான பித்தளை தேய்ப்பு பெட்டிகளையும் வழங்கினாா். முன்னதாக அவா், பொதுமக்கள் அளித்த மனுக்கள் மீது விரைவாக நடவடிக்கை மேற்கொண்ட 20 நில அளவையா்களுக்கு பாராட்டுச் சான்றிதழை வழங்கினாா்.

இக்கூட்டத்தில் மாவட்ட வருவாய் அலுவலா் ம.ச.கலைவாணி, மாவட்ட பிற்படுத்தப்பட்டோா் மற்றும் சிறுபான்மையினா் நல அலுவலா் உமா மகேஸ்வரன் உள்ளிட்டோா் கலந்து கொண்டனா்.