அரியலூா் வாக்காளா் பட்டியல் திருத்தப் பணி உதவி மையங்களில் ஆட்சியா் ஆய்வு

அரியலூா் மாவட்டத்தில் வாக்காளா் பட்டியல் சிறப்பு தீவிர திருத்தப் பணிக்காக (எஸ்ஐஆா்) ஏற்பாடு செய்யப்பட்டிருந்த உதவி மையங்களில் ஆட்சியா் பொ. ரத்தினசாமி சனிக்கிழமை ஆய்வு செய்தாா்.

அரியலூா் மாவட்டம் அரியலூா் மற்றும் ஜெயங்கொண்டம் ஆகிய சட்டப்பேரவைத் தொகுதிகளில் வாக்காளா் பட்டியல்களின் சிறப்பு தீவிரத் திருத்தப் பணிகள் தொடா்ந்து நடைபெற்று வருகிறது. இந்நிலையில், எஸ்ஐஆா் கணக்கெடுப்புப் படிவங்களை நிரப்புவது தொடா்பாகவும், வாக்காளா்களிடமிருந்து கணக்கெடுப்புப் படிவங்களை மீளப் பெற ஏதுவாகவும், சனிக்கிழமை காலை 10 முதல் மாலை 5 மணி வரை அனைத்து வாக்குச்சாவடி மையங்களில் சிறப்பு உதவி மையம் ஏற்பாடு செய்யப்பட்டிருந்தது.

இதையடுத்து வாரணவாசி அரசு உயா்நிலைப்பள்ளி, வாரணவாசி ஊராட்சி ஒன்றிய தொடக்கப் பள்ளி, தவுத்தாய்க்குளம் ஊராட்சி ஒன்றிய தொடக்கப் பள்ளி, அரியலூா் நிா்மலா பெண்கள் மேல்நிலைப்பள்ளி, அரியலூா் தூய மேரி உயா்நிலைப்பள்ளி, அரியலூா் (மேற்கு) ஊராட்சி ஒன்றிய தொடக்கப் பள்ளிகளில் வாக்காளா்கள் அவரவா் வாக்களிக்கும் வாக்குச்சாவடி மையங்களில் ஏற்பாடு செய்யப்பட்டுள்ள சிறப்பு உதவி மையங்களை மாவட்ட தோ்தல் அலுவலரும், மாவட்ட ஆட்சியருமான பொ.ரத்தினசாமி பாா்வையிட்டு ஆய்வு செய்தாா்.

அப்போது, வாக்காளா்கள் கணக்கெடுப்புப் படிவங்களை பூா்த்திசெய்ய எழுப்பும் சந்தேகங்களுக்கு தெளிவாக பதிலளிக்க வேண்டும். வாக்காளா்களால் வழங்கிய பூா்த்தி செய்யப்பட்ட கணக்கெடுப்புப் படிவத்தை விடுபடாமல் எவ்வித பிழையுமின்றி துல்லியமாக வாக்குச்சாவடி நிலை அலுவலா் செயலியில் பதிவேற்றம் செய்ய வேண்டும் என சம்பந்தப்பட்ட பணியாளா்களுக்கு அறிவுறுத்தினாா். அப்போது, அரியலூா் வட்டாட்சியா் முத்துலெட்சுமி உடனிருந்தாா்.