ஆண்டு முழுவதும் உழைக்கும் கட்சி அதிமுகவே: நடிகர் ஆனந்தராஜ் பேச்சு

மக்களுக்காக ஆண்டு முழுவதும் உழைக்கும் கட்சி அதிமுகவே என்றார் நடிகர் ஆனந்தராஜ்.

கரூர் தொகுதிக்குட்பட்ட தாந்தோணி மேற்கு ஒன்றிய அதிமுக சார்பில் சனிக்கிழமை ஒன்றியத்துக்குட்பட்ட ஆண்டாங்கோவில் கிழக்கு, மேற்குப் பகுதிகளில் ஒன்றியச் செயலர் எம்.ஆர். விஜயபாஸ்கர் தலைமையில் நடைபெற்ற அண்ணா பிறந்தநாள் மற்றும் அதிமுக அரசின் நான்காண்டு சாதனை விளக்க தெருமுனை பிரசார கூட்டத்தில் பங்கேற்று மேலும் அவர் பேசியது:

"கருணாநிதி மகன் ஆட்டோ ஓட்டுகிறார், ராட்டை சுற்றுகிறார். நடந்து போகிறார். இதையெல்லாம் அவர் துணை முதல்வராக இருந்தபோதே செய்திருக்க வேண்டும். பாஸ்மார்க் வாங்க முடியாத கட்சிகள் எல்லாம், இன்று டாஸ்மாக்கை கையியெடுக்க ஆரம்பித்துவிட்டன. இதற்கு முன்னரெல்லாம் தமிழகத்தில் டாஸ்மாக் கடை இல்லாமல் இருந்ததா? இப்போதும் கேரளம், கர்நாடகத்தில் எல்லாம் மதுக்கடைகள் இருக்கத்தான் செய்கின்றன. அவர்களுக்கு எதிராகக் குரல் கொடுக்க வேண்டியதுதானே. ஆறுமாதம் மட்டும் பணியாற்றக்கூடிய கட்சி அதிமுக அல்ல, ஆண்டு முழுவதும் உழைக்கும் கட்சி. தமிழக முதல்வருக்கு தமிழக மக்களாகிய நீங்கள்தான் குடும்பம் என்றார்.

கரூர் தொகுதிச் செயலர் எஸ். திருவிகா வரவேற்றார். இதில் மக்களவை துணைத் தலைவர் மு. தம்பிதுரை, எம்எல்ஏ வி. செந்தில்பாலாஜி, மாவட்ட துணைச்செயலர் காளியப்பன், பொருளாளர் முரளி, முன்னாள் மாவட்டச் செயலர் சாகுல்அமீது உள்ளிட்டோர் பங்கேற்றனர்.