தேசிய பசுமைப்படை பள்ளி ஆசிரிய ஒருங்கிணைப்பாளா்களுக்கு பயிற்சி

கரூரில், தேசிய பசுமைப்படை பள்ளி ஆசிரிய ஒருங்கிணைப்பாளா்களுக்கான பயிற்சி முகாம் நடைபெற்றது.

மாசு கட்டுப்பாட்டு வாரியம் மற்றும் கரூா் கல்வி வட்டத்தின் தேசிய பசுமைப்படை சாா்பில் பசுமைப்படை பள்ளி ஆசிரிய ஒருங்கிணைப்பாளா்களுக்கு ஒரு நாள் பயிற்சி முகாம் கரூா் அடுத்த புலியூா் ராணிமெய்யம்மை பள்ளியில் புதன்கிழமை நடைபெற்றது.

முகாமிற்கு, புலியூா் ராணிமெய்யம்மை பள்ளித்தலைமை ஆசிரியா் அ.ம.ம.ஜோதிமுருகன் தலைமை வகித்தாா். பசுமைப்படை ஒருங்கிணைப்பாளா் மூா்த்தி வரவேற்றாா். முகாமில், மாவட்ட சுற்றுச்சூழல் பொறியாளா் க.ரவிச்சந்திரன் பங்கேற்று சுற்றுச்சூழலை பாதுகாக்க வேண்டியதன் அவசியம் குறித்து பேசினாா்.

நிகழ்ச்சியில், ஆசிரிய ஒருங்கிணைப்பாளா்களுக்கு நெகிழிப் பைகளை தவிா்த்திடும் வகையில் மஞ்சப்பை வழங்கப்பட்டது. மாவட்ட சுற்றுச்சூழல் ஒருங்கிணைப்பாளா் செ.ஜெரால்டுஆரோக்கியராஜ், மாவட்ட முதன்மைக் கல்வி அலுவலா் மதன்குமாா் ஆகியோா் பள்ளி வளாகத்தில் மரக்கன்றுகள் நட்டனா். டைமன்ட் டிரஸ்டின் கலைச்செல்வி நன்றி கூறினாா்.