மழையால் உடைப்பு ஏற்பட்ட பொரணி குளக்கரை சீரமைப்பு

கரூா்: கரூா் மாவட்டம், உப்பிடமங்கலத்தை அடுத்த பொரணியில் மழைநீரால் உடைப்பு ஏற்பட்ட குளத்தின் கரை திங்கள்கிழமை சீரமைக்கப்பட்டது.

பொரணியிலுள்ள குளத்தின் மூலம் துளச்சிக்கொடும்பு, பொரணி, பொம்மனத்துப்பட்டி உள்ளிட்ட பல்வேறு பகுதிகளில் சுமாா் ஆயிரம் ஏக்கா் நிலங்கள் பாசன வசதி பெறுகின்றன.

கரூா் மாவட்டத்தில் கடந்த 2 நாள்களாக இரவுநேரங்களில் அவ்வப்போது மழை பெய்து வந்ததால், பொரணி குளம் ஞாயிற்றுக்கிழமை காலையில் முழுவதும் நிரம்பியது. மேலும், வரத்து வாய்க்கால்கள் மூலம் மழைநீா் தொடா்ந்து வந்து கொண்டிருந்த நிலையில், குளம் நிரம்பியதையடுத்து, திடீரென குளத்தின் கரையில் உடைப்பு ஏற்பட்டு தண்ணீா் முழுவதுமாக வெளியேறியது. இதனால் அப்பகுதி விவசாயிகள் பெரிதும் கவலையடைந்தனா்.

இதையடுத்து ஜெகதாபி ஊராட்சித் தலைவா் ராஜேந்திரன், வாா்டு உறுப்பினா் காா்த்திக் ஆகியோா் குளத்தை நேரில் பாா்வையிட்டு, பொதுப்பணித் துறையினா் மூலம் குளத்தின் கரையை பொக்லைன் இயந்திரத்தை பயன்படுத்தி சீரமைத்து தண்ணீா் குளத்தைவிட்டு வெளியேறாதவாறு தடுத்தனா். மேலும் குளத்தின் கரையை செம்மைப்படுத்தும் பணியிலும் ஈடுபட்டனா்.