பாடாலூரில் ஆங்கில, ஹிந்தி இலவச பயிற்சி வகுப்புகள்

பெரம்பலூர் மாவட்டம், பாடாலூரில் மக்கள் சிந்தனைப் பேரவை மற்றும் பாடாலூர் ஊராட்சி நிர்வாகம் சார்பில் மாணவ, மாணவிகளுக்கு ஆங்கிலம் மற்றும் ஹிந்தி இலவசப் பயிற்சி வகுப்புகள் தொடக்க விழா சனிக்கிழமை நடைபெற்றது.

பாடாலூர் ஊராட்சிக்குள்பட்ட பள்ளி மாணவ, மாணவிகளின் நலன் கருதி சனி மற்றும் ஞாயிற்றுக்கிழமை தோறும் காலை 10 முதல் 12 மணி வரை ஹிந்தி வகுப்புகளும், திங்கள் முதல் வெள்ளிக்கிழமை வரை மாலை 6 முதல் 8 மணி வரை ஆங்கில பயிற்சியும் இலவசமாக அளிக்கப்படுகிறது. பாடாலூர் ஊராட்சி அலுவலக கூட்டரங்கில் நடைபெற்ற பயிற்சி வகுப்பை ஆட்சியர் தரேஸ் அஹமது தொடங்கி வைத்தார்.

இந்நிகழ்ச்சியில், மக்கள் சிந்தனைப் பேரவை மாவட்டத் தலைவர் நா. ஜெயராமன், மாவட்டச் செயலர் பி. துரைசாமி, பாடாலூர் ஊராட்சித் தலைவர் வேல்முருகன், ஊராட்சி ஒன்றிய தொடக்கப்பள்ளி தலைமை ஆசிரியர் கீதா, ஆங்கில பயிற்சி ஆசிரியர் பழனிச்சாமி, ஹிந்தி பயிற்சி ஆசிரியை ஆயிஷா, மக்கள் சிந்தனைப் பேரவை நிர்வாகிகள் ரவிச்சந்திரன், மாதேஷ் உள்பட மாணவ, மாணவிகள் பலர் பங்கேற்றனர்.