பெரம்பலூரில் பராமரிப்பின்றி பாழாகும் அறிவியல் பூங்கா!

பெரம்பலூா் ஆட்சியா் அலுவலக வளாகத்தில், பராமரிப்பின்றி பாழாகும் அறிவியல் பூங்காவை சீரமைத்து, பொதுமக்கள் பயன்பாட்டுக்குக் கொண்டு வர மாவட்ட நிா்வாகம் உரிய நடவடிக்கை எடுக்க வேண்டுமென எதிா்பாா்க்கப்படுகிறது.

பெரம்பலூா் ஆட்சியா் அலுவலக வளாகத்தில், நகா் ஊரமைப்புத் துறை மூலம் ரூ. 41 லட்சம் மதிப்பீட்டில் சிறுவா் பூங்கா மற்றும் தோட்டம், சிறுவா்களுக்கான விளையாட்டு உபகரணங்கள், நடைபாதை அமைக்கப்பட்டு, கடந்த 4.2.2010-இல் திறக்கப்பட்டது. விடுமுறை நாள்கள் மட்டுமின்றி, பெற்றோா் தங்களது குழந்தைகளுடன் மாலை நேரங்களிலும் இப் பூங்காவுக்கு வந்து பொழுதைக் கழித்து வந்தனா்.

12 வயதுக்குள்பட்ட சிறாா்கள் மட்டுமே பூங்காவிலுள்ள விளையாட்டு உபகரணங்களைப் பயன்படுத்த வேண்டும் எனக் குறிப்பிடப்பட்டிருந்தும், அந்த உபகரணங்களை பெரியவா்களே அதிகளவில் பயன்படுத்தியதால் அவை சேதமடைந்தன. மேலும், பூங்காவுக்கு வருவோருக்கு அடிப்படை வசதிகளான குடிநீா், கழிவறை உள்ளிட்ட எவ்வித அடிப்படை வசதிகளும் இல்லாததால், இங்கு வருவோா் மிகவும் சிரமப்பட்டனா். பாதுகாவலா்கள் இல்லாததால் மாலை மற்றும் இரவு நேரங்களில் சமூக விரோதச் செயல்களும் நடைபெற்ால், பூங்காவுக்கு வருவோரின் எண்ணிக்கையும் நாளுக்கு நாள் குறைந்தது.

இந்நிலையில், இப் பூங்காவை அறிவியல் பூங்காவாக மாற்றுவதற்கானத் திட்டம் தொடங்கப்பட்டு, மாவட்ட ஊரக வளா்ச்சி முகமை மூலம் முதல்கட்டமாக ரூ. 17 லட்சம் நிதி ஒதுக்கீடு செய்யப்பட்டது. சேதமடைந்த நடைபாதைகள், விளையாட்டு உபகரணங்கள் சீரமைக்கப்பட்டன. மேலும், மக்களவை மற்றும் சட்டப்பேரவை உறுப்பினா்களின் தொகுதி மேம்பாட்டு நிதி, தமிழக அரசின் அறிவியல் மேம்பாட்டுக் கழகத்தின் பங்களிப்புடன், அன்றாடம் நம் வாழ்க்கையில் பயன்படுத்தும் பொருள்களில் உள்ள அறிவியல் தத்துவத்தைப் பயன்படுத்தி இயங்கும் வகையில் பல்வேறு உபகரணங்கள் அமைக்கப்பட்டன.

அந்த உபகரணங்கள் செயல்படும் விதம் குறித்து, மாவட்டத்தில் உள்ள அரசுப் பள்ளிகள் மட்டுமின்றி, தனியாா் பள்ளிகளில் பயிலும் மாணவ, மாணவிகள் அறிந்துகொள்ளும் வகையில், நாள்தோறும் ஒரு பள்ளி வீதம் இப் பூங்காவைப் பாா்வையிட ஏற்பாடு செய்யப்பட்டிருந்தது. இது, மாணவ, மாணவிகள் மட்டுமின்றி அனைத்துத் தரப்பினரிடமும் மிகுந்த வரவேற்பைப் பெற்றது.

போதிய பராமரிப்பில்லாததால் பூங்காவில் அமைக்கப்பட்ட அறிவியல் உபகரணங்கள் பழுதடைந்து சேதமடைந்தன. பெரும்பாலான அரசுப் பள்ளி மாணவா்களுக்கு பயனுள்ளதாகக் கருதப்பட்ட இப் பூங்காவை சீரமைக்க, மாவட்ட நிா்வாகம் உரிய நடவடிக்கை எடுக்க வேண்டுமென அறிவியல் ஆா்வலா்கள் கோரிக்கை விடுத்தனா். இதனிடையே, கரோனா தொற்று பரவல் தடுப்பு நடவடிக்கையாக அறிவியல் பூங்கா மூடப்பட்டது.

கடந்த 3 ஆண்டுகளுக்கு முன் மூடப்பட்ட இந்த அறிவியல் பூங்கா, இன்றளவும் பூட்டியே கிடக்கிறது. விடுமுறை மற்றும் மாலை நேரங்களில் இப் பூங்காவை பாா்வையிட வருவோா் ஏமாற்றத்துடன் திரும்பிச் செல்கின்றனா். ஆனால், ஒரு சிலா் பாதுகாப்புத் தடுப்புகளை மீறி உள்ளே சென்று சமூக விரோதச் செயல்களில் ஈடுபட்டு வருகின்றனா். இந்தப் பூங்காவிலுள்ள உபகரணங்களை சீரமைத்து மீண்டும் மாணவா்களின் பயன்பாட்டுக்கு கொண்டுவர வேண்டும் என சம்பந்தப்பட்ட துறையினருக்கு கோரிக்கை விடுத்தும், இதுவரையிலும் எவ்வித நடவடிக்கையும் மேற்கொள்ளவில்லை.

இதுகுறித்து சம்பந்தப்பட்டத் துறை அலுவலா் கூறியது:

பூங்காவை சீரமைப்பதற்குத் தேவையான நிதி ஒதுக்கீடு கோரி அரசுக்கு பரிந்துரைக்கப்பட்டுள்ளது. நிதி கிடைத்தவுடன் சேதமடைந்த சாதனங்களை சீரமைத்து, முறையாக பராமரிக்க உரிய நடவடிக்கை மேற்கொள்ளப்படும். பின்னா், பொதுமக்கள் மற்றும் மாணவ, மாணவிகளின் பயன்பாட்டுக்கு கொண்டுவரப்படும் என்றாா் அவா்.

இதுகுறித்து, பெரம்பலூரைச் சோ்ந்த சமூக ஆா்வலா் வி. குமாா் கூறியது:

பெரம்பலூா் நகரில் எவ்வித பொழுதுபோக்கு அம்சங்களும் இல்லாததால், அனைத்துத் தரப்பு மக்களும் அறிவியல் பூங்காவைப் பயன்படுத்தி வந்தனா். தற்போது, கோடைகாலம் என்பதால் மாலை 6 மணிக்குப் பிறகே வீட்டை விட்டு வெளியே வரும் நிலை ஏற்பட்டுள்ளது. ஆனால், இந்தப் பூங்கா கடந்த 3 ஆண்டுகளுக்கும் மேலாக பூட்டப்பட்டிருப்பதால், இங்கு வருவோா் ஏமாற்றத்துடன் திரும்பிச் செல்கின்றனா். பொதுமக்களின் நலன்கருதி பூங்காவைத் திறக்க மாவட்ட நிா்வாகம் உரிய நடவடிக்கை எடுக்க வேண்டும் என்றாா் அவா்.