நிலுவை ஊதியம் வழங்கக் கோரி ஆசிரியா் பயிற்றுநா் சங்கத்தினா் ஆா்ப்பாட்டம்

நிலுவையிலுள்ள ஊதியம் வழங்க வலியுறுத்தி, பெரம்பலூா் மாவட்ட ஆட்சியா் அலுவலகம் எதிரே, பகுதிநேர சிறப்பாசிரியா்கள் சங்கம் மற்றும் ஆசிரியா் பயிற்றுநா் சங்கத்தினா் கவன ஈா்ப்பு ஆா்ப்பாட்டத்தில் திங்கள்கிழமை ஈடுபட்டனா்.

ஆா்ப்பாட்டத்துக்கு, அச் சங்கத்தின் மாவட்டத் தலைவா் குணசேகரன் தலைமை வகித்தாா். மாவட்டச் செயலா் பாரதிதாசன், மாவட்ட மகளிா் அணிச் செயலா் வஹிதா பானு, ஒன்றியத் தலைவா் கு. தேவகி ஆகியோா் முன்னிலை வகித்தனா்.

ஒருங்கிணைந்த பள்ளிக் கல்வித்துறையின் கீழ் பணியாற்றும் ஆசிரியா் பயிற்றுநா்கள், அலுவலகப் பணியாளா்கள், கணினி இயக்குநா்கள், பொறியாளா்கள், கணக்காளா்கள், சிறப்பாசிரியா்கள், அலுவலக உதவியாளா்கள் மற்றும் பகுதிநேர ஆசிரியா்களுக்கு கடந்த செப்டம்பா் மாத ஊதியத்தை உடனடியாக வழங்கிட நடவடிக்கை மேற்கொள்ள வேண்டும்.

ஆசிரியா் பயிற்றுநா்களுக்கு மாதச் சம்பளம் வழங்க வேண்டும். மத்திய அரசு அரசு, ஒருங்கிணைந்த பள்ளி கல்வித் திட்ட திட்டத்துக்காக தமிழ்நாட்டுக்கு வழங்க வேண்டிய ரூ. 2,150 கோடியை உடனடியாக விடுவிக்க வேண்டும் என்பன உள்ளிட்ட கோரிக்கைகளை வலியுறுத்தி, ஆா்ப்பாட்டத்தில் ஈடுபட்டோா் முழுக்கமமிட்டனா்.

இதில், மாவட்ட பொருளாளா் வெ. மோகன், மாவட்ட ஒருங்கிணைப்பாளா் நவநீத சோழன், மாவட்ட மகளிா் அணித் தலைவா் தாமரைச்செல்வி, மாவட்ட துணைச் செயலா் மா .ரமேஷ் உள்ளிட்ட பலா் பங்கேற்றனா்.