தனியாா் கல்லூரி பேருந்து மீது லாரி மோதல்: 10 மாணவா்கள் காயம்

பெரம்பலூா் அருகே புதன்கிழமை மாலை தனியாா் பொறியியல் கல்லூரி பேருந்து மீது பட்டாசு ஏற்றிச் சென்ற லாரி மோதி ஒரு மாணவி உள்பட 10 மாணவா்கள் பலத்த காயமடைந்தனா்.

திருச்சியிலுள்ள தனியாா் பொறியியல் கல்லூரியில் பயிலும் பெரம்பலூா், அரியலூா் மாவட்டங்களைச் சோ்ந்த 60 மாணவ, மாணவிகளை, அக் கல்லூரிக்குச் சொந்தமான பேருந்தில் ஏற்றிக்கொண்டு, அரியலூா் நோக்கி புதன்கிழமை மாலை சென்றுக்கொண்டிருந்தது. இப் பேருந்து, திருச்சி- சென்னை தேசிய நெடுஞ்சாலையில், பெரம்பலூா் அருகேயுள்ள கல்பாடி பிரிவுச் சாலையிலுள்ள நிறுத்தத்தில், அப்பகுதியைச் சோ்ந்த மாணவ, மாணவிகள் இறங்கிக்கொண்டிருந்தனா். அப்போது, சிவகாசியிலிருந்து சென்னை நோக்கி பட்டாசுகள் ஏற்றிச்சென்ற லாரி பேருந்தின் பின்புறம் மோதி விபத்துக்குள்ளானது.

இவ் விபத்தில், பெரம்பலூா் மாவட்டம், தேனூரைச் சோ்ந்த செல்வராஜ் மகன் காா்த்திக் (21), பரவாய் கிராமத்தைச் சோ்ந்த மூக்கன் மகன் ஆகாஷ் (19), மேலமாத்தூரைச் சோ்ந்த பெரியசாமி மகன் கவியரசன் (21), சாத்தநத்தத்தைச் சோ்ந்த கருப்பையா மகன் தீபக் (20), துங்கபுரத்தைச் சோ்ந்த கணேசன் மகன் தனித்தமிழ் நாடன் (20), பீல்பாடியைச் சோ்ந்த பெருமாள் மகன் பிரகாஷ் (19), அரியலூா் பெரிய தெருவைச் சோ்ந்த மகேந்திரன் மகன் சஞ்சய்ராஜ் (21), பெரியாா் நகரைச் சோ்ந்த ராஜேந்திரன் மகன் ராமநாதன் (21), ராஜாஜி நகரைச் சோ்ந்த முருகன் மகன் காா்த்திகேயன் (20), சிட்டிபாபு தெருவைச் சோ்ந்த ராஜா மகள் பிரியதா்ஷினி (20) ஆகியோா் பலத்த காயமடைந்தனா்.

தகவலறிந்த பெரம்பலூா் போலீஸாா் நிகழ்விடத்துக்குச் சென்று காயமடைந்த மாணவா்களை மீட்டு, மாவட்ட அரசு தலைமை மருத்துவமனைக்கு அனுப்பிவைத்தனா். இதுகுறித்து பெரம்பலூா் போலீஸாா் வழக்குப் பதிந்து, லாரி ஓட்டுநரான ஸ்ரீவில்லிபுத்தூா், இந்திரா நகரைச் சோ்ந்த ராஜூ மகன் சக்தியை (54) கைது செய்து விசாரணை மேற்கொண்டு வருகின்றனா்.