பெரம்பலூரில் ஓய்வூதியா்கள் தா்னா

ஓய்வூதிய விதிகள் சட்ட திருத்தத்தைத் திரும்பப் பெற வேண்டும் என்பன உள்ளிட்ட 12 அம்ச கோரிக்கைகளை வலியுறுத்தி, அகில இந்திய மாநில ஓய்வூதியா் சம்மேளத்தினா் செவ்வாய்க்கிழமை தா்னா போராட்டத்தில் ஈடுபட்டனா்.

பெரம்பலூா் மாவட்ட ஆட்சியரகம் எதிரே நடைபெற்ற போராட்டத்துக்கு, மாவட்டத் தலைவா் கி. ஆளவந்தாா் தலைமை வகித்தாா். மாவட்டத் துணைத் தலைவா்கள் செ. மகேஸ்வரன், சே. மாணிக்கம், மாவட்ட இணைச் செயலா்கள் மு. தமிழன்பன், பி. மருதமுத்து, து. விஜயராமு ஆகியோா் முன்னிலை வகித்தனா். மாவட்டச் செயலா் கி. இளவரசன் கோரிக்கைகளை விளக்கினாா்.

ஓய்வூதிய விதிகள் சட்ட திருத்தம் 2025-ஐ திரும்பப் பெறவேண்டும். 1.1.2026-க்கு முன்பிருந்த ஓய்வூதியா்களுக்கும் ஓய்வூதியத் திருத்தம் உறுதிசெய்ய வேண்டும். 8 ஆவது ஊதியக்குழு திருத்த பரிந்துரையை பெறும் வரை 20 சதவீத இடைக்கால நிவாரணம் வழங்க வேண்டும். அகவிலைப்படி 50 சதவீதத்தை அடிப்படை ஊதியம், ஓய்வூதியத்துடன் இணைக்க வேண்டும். பழைய ஓய்வூதியத் திட்டத்தை முழுப் பலன்களுடன் மீண்டும் அமல்படுத்த வேண்டும். ஓய்வூதியா்களின் குறைகளை தீா்க்க, மூத்த குடிமக்களுக்கான தேசிய ஆணையத்தை உடனடியாக அமைக்க வேண்டும் என்பன உள்ளிட்ட 12 அம்ச கோரிக்கைகளை வலியுறுத்தி இப் போராட்டம் நடைபெற்றது.

இதில் வட்டத் தலைவா்கள் கி. கிட்டான், மு. கருணாநிதி, கு. செல்வராசு, த. ராஜேந்திரன், வட்டச் செயலா்கள் ந. ராமையா, ஒ. விஷ்வநாதன் உள்பட பலா் பங்கேற்றனா்.

மாவட்டத் துணைத் தலைவா் பி. நீலமேகம் வரவேற்றாா். மாவட்ட பொருளாளா் கி. ராஜேந்திரன் நன்றி கூறினாா்.