அரசுப் பணியாளர்களுக்கான மாநில மேசை பந்துப்போட்டி: புதுகை மூன்றாமிடம்

அரசுப் பணியாளர்களுக்கு இடையே மாநில அளவில் நடைபெற்ற மேசை பந்துப் போட்டியில் புதுக்கோட்டை மாவட்ட அணியினர் மூன்றாம் பரிசை வென்றுள்ளனர்.

தமிழ்நாடு விளையாட்டு மேம்பாட்டு ஆணையம் மூலம் அரசுப் பணியாளர்களுக்கான மாநில அளவிலான மேசை பந்து விளையாட்டுப் போட்டிகள் சென்னை நேரு உள் விளையாட்டரங்கில் 10.9.2015 முதல் 12.9.2015 வரை 3 நாள்கள் நடைபெற்றது. இதில் தமிழகத்திலுள்ள 14 மாவட்டங்களைச் சேர்ந்த அரசுப் பணியாளர்களைக் கொண்ட அணிகள் பங்கேற்றன.

அதில், புதுக்கோட்டை மாவட்டத்தைச் சேர்ந்த அரசுப் பணியாளர்கள் கு. மனோகரன், எஸ். முகமதுரபீ, உடற்கல்வி ஆசிரியர் எஸ். சுப்புராமன், முதுகலை ஆசிரியர்கள் இரா. சரவணன், து. இன்பராஜ் ஆகியோரைக் கொண்ட அணியினர் கலந்துகொண்டு மாநில அளவில் மூன்றாம் பரிசை வென்றுள்ளனர்.இதையடுத்து, மாவட்ட ஆட்சியரின் முகாம் அலுவலகத்தில் திங்கள்கிழமை நடைபெற்ற நிகழ்ச்சியில், புதுக்கோட்டை மாவட்ட அரசுப் பணியாளர்கள் அணியினருக்கு ஆட்சியர் சு. கணேஷ் நேரில் வாழ்த்துத் தெரிவித்தார். இதில், மாவட்ட விளையாட்டு அலுவலர் எஸ். வாஞ்சிநாதன் உள்ளிட்டோர் கலந்துகொண்டனர்.