வடமாடு மஞ்சு விரட்டு: காளைகள் முட்டியதில் 10 பேர் காயம்

புதுக்கோட்டை அருகே சேங்கைதோப்பில் ஞாயிற்றுக்கிழமை நடைபெற்ற வடமாடு மஞ்சுவிரட்டில் காளைகள் முட்டியதில் 10 பேர் காயமடைந்தனர். 
வீரமுத்தரையர் சங்கத்தின் 8ஆம் ஆண்டு தொடக்க விழாவையொட்டி நடைபெற்ற வடமாடு மஞ்சுவிரட்டில் புதுக்கோட்டை, திண்டுக்கல், திருச்சி உள்ளிட்ட மாவட்டங்களில் இருந்து 13 காளைகள் பங்கேற்றன. 9 பேர் கொண்ட குழு என மொத்தம் 108 மாடுபிடி வீரர்கள் கலந்து கொண்டு காளைகளை அடக்கினர். காயமடைந்த 10 பேருக்கு தயார் நிலையில் இருந்த மருத்துவக் குழுவினர் சிகிச்சை அளித்தனர். சட்டப்பேரவை முன்னாள் உறுப்பினர் கார்த்திக் தொண்டைமான், வீரமுத்தரையர் சங்கத் தலைவர் கே.கே.செல்வக்குமார் உள்ளிட்ட ஏராளமானோர் மஞ்சுவிரட்டை பார்வையிட்டனர். பாதுகாப்பு பணிகளை கணேஷ்நகர் போலீஸார் செய்திருந்தனர்.