சிறப்பு கால்நடை மருத்துவ முகாம்: அமைச்சா் தொடங்கி வைத்தாா்

புதுக்கோட்டை மாவட்டம், ஆலங்குடி அருகேயுள்ள வெண்ணாவல்குடியில் கால்நடை மருத்துவம், விழிப்புணா்வு முகாமை சுற்றுச்சூழல், இளைஞா்நலன் மற்றும் விளையாட்டுத்துறை அமைச்சா் சிவ.வீ.மெய்யநாதன் வியாழக்கிழமை தொடங்கி வைத்தாா்.

மாவட்ட வருவாய் அலுவலா் மா.செல்வி தலைமையில் நடைபெற்ற முகாமை தொடங்கி வைத்து அமைச்சா் சிவ.வீ.மெய்யநாதன் பேசியது:

திருவரங்குளம் ஊராட்சி ஒன்றியம், வெண்ணாவல்குடி கிராமத்தில் சிறப்பு கால்நடை சுகாதார, விழிப்புணா்வு முகாம் தொடங்கி வைக்கப்பட்டுள்ளது.

மேலும், இதேபோன்று புதுக்கோட்டை மாவட்டத்தில் உள்ள 13 ஊராட்சி ஒன்றியங்களிலும் ஒரு ஒன்றியத்திற்கு 20 முகாம்கள் வீதம் மொத்தம் 260 சிறப்பு கால்நடை சுகாதார மற்றும் விழிப்புணா்வு முகாம்கள் 3 மாதத்திற்குள் நடத்தப்படவுள்ளது. வெண்ணாவல்குடி ஊராட்சியில் சாலை வசதி உள்ளிட்ட பல்வேறு வசதிகள் நிறைவேற்றப்பட்டுள்ளது. பேருந்து வசதியை வெண்ணாவல்குடியிலிருந்து வேங்கிடக்குளம் வரை நீட்டிக்க நடவடிக்கை மேற்கொள்ளப்பட்டுள்ளதுடன், ஆலங்குடி முதல் குளவாய்பட்டி வரை இருவழிச் சாலை அமைக்கப்படவுள்ளது. இதேபோன்று பொதுமக்களின் ஏனைய கோரிக்கைகளும் நிறைவேற்ற உரிய நடவடிக்கை மேற்கொள்ளப்படும் என்றாா்.

முகாமில் கால்நடைத்துறை மண்டல இணை இயக்குநா் சம்பத், ஒன்றியக்குழுத் தலைவா் வள்ளியம்மை தங்கமணி உள்ளிட்டோா் பங்கேற்றனா்.