கோவை மருத்துவரிடம் ரூ.2.85 கோடி மோசடி: ஊராட்சித் தலைவா் கைது

கோவை மருத்துவரிடம் கடன் பெற்றுத் தருவதாகக் கூறி, ரூ.2.85 கோடி மோசடி செய்த புகாரில் தலைமறைவான பாச்சிக்கோட்டை ஊராட்சித் தலைவா் பன்னீா்செல்வத்தை சென்னையில் மத்திய குற்றப்பிரிவுக் காவல்துறையினா் வியாழக்கிழமை கைது செய்தனா்.

கோவையில் பல்நோக்கு மருத்துவமனை நடத்திவரும் மருத்துவா் மாதேஸ்வரன், புதிதாக மருத்துவமனை கட்டுவதற்கு ரூ.50 கோடி கடன் பெற்றுத்தரும்படி புதுக்கோட்டை மாவட்டம், ஆலங்குடி அருகிலுள்ள பாச்சிக்கோட்டை ஊராட்சித் தலைவா் ந.பன்னீா்செல்வத்தை(56) அனுகினாராம்.

கடன் பெற்றுத் தருவதாகதற்காக தனக்கு ரூ.2 கோடியும், ஆவணச்செலவுக்காக ரூ.85 லட்சம், காசோலை, கையெழுத்திட்ட பத்திரங்களையும் பன்னீா்செல்வம் வாங்கிக்கொண்டு கடன் பெற்றுத்தரவில்லையாம். பணத்தை திருப்பி கேட்டபோது, மாதேஸ்வரனுக்கு கொலை மிரட்டல் விடுத்தாராம்.

இதுகுறித்து மாதேஸ்வரன் அளித்த புகாரைத் தொடா்ந்து, கோவை குற்றப்பிரிவு காவல் உதவி ஆணையா் பாா்த்திபன் தலைமையிலான காவல்துறையினா், ஆலங்குடியில் பன்னீா்செல்வத்தின் இரு வீடுகள், இரு பெட்ரோல் விற்பனை நிலையங்கள் உள்ளிட்ட 6 இடங்களில் ஜூலை 4,5 தேதிகளில் சோதனையிட்டனா்.

அப்போது,முக்கிய ஆவணங்களைக் கைப்பற்றிய காவல்துறையினா், தலைமறைவான பன்னீா்செல்வத்தை தனிப்படை அமைத்து தேடிவந்தனா். இந்நிலையில், சென்னையிலுள்ள தங்கும் விடுதியில் பன்னீா்செல்வம், மோசடியில் அவருக்கு உதவிய செல்வகுமாா் ஆகியோரை மத்திய குற்றப்பிரிவுக் காவல்துறையினா் வியாழக்கிழமை கைது செய்தனா்.