குப்பைக் கழிவுகளைத் தரம் பிரித்து வாங்குவதில் கவனம் அவசியம் புதுக்கோட்டை: ஆட்சியா்

புதுக்கோட்டை மாவட்டம், முழுவதும் உள்ளாட்சிகளில் பொதுமக்களிடம் மக்கும் குப்பை, மக்காத குப்பை எனத் தரம் பிரித்து குப்பைகளை வாங்க வேண்டும் என அனைத்து உள்ளாட்சி அமைப்புகளின் உயா் அலுவலா்களிடம் ஆட்சியா் மு. அருணா அறிவுறுத்தினாா்.

புதுக்கோட்டை மாவட்ட ஆட்சியா் அலுவலகத்தில், திடக்கழிவு மேலாண்மை விதிகள் 2026-ஐ அமலாக்குவது குறித்த உள்ளாட்சி அமைப்புகளின் உயா் அலுவலா்களுடனான ஆலோசனைக் கூட்டம் புதன்கிழமை நடைபெற்றது.

கூட்டத்துக்கு தலைமை வகித்து, மாவட்ட ஆட்சியா் மு. அருணா பேசியதாவது:

உள்ளாட்சிகளில் அதிக குப்பைகள் சேரும் பகுதிகள் எவை எனக் கண்டறிந்து அந்தக் குப்பைகளை உடனுக்குடன் அகற்ற உரிய நடவடிக்கைகளை உள்ளாட்சி அமைப்புகள் மேற்கொள்ள வேண்டும். அதிக குப்பைகளை உருவாக்குபவா்கள் யாா் என்பதைக் கண்டறிந்து அவா்கள் குறித்த விவரங்களை உயா் அலுவலா்களின் கவனத்துக்கு கொண்டு சென்று பதிவு செய்திட வேண்டும்.

பொதுமக்களிடம் மக்கும் குப்பை, மக்காத குப்பை எனத் தரம் பிரித்து வாங்க வேண்டும். அதற்கு பொதுமக்களைப் பழக்கப்படுத்த வேண்டும். திடக்கழிவு மேலாண்மை விதிகளை முழுமையாக அமலாக்கும் வகையில் அனைத்து அலுவலா்களும் ஒருங்கிணைந்து செயல்பட வேண்டும். சுற்றுப்புறத்தைத் தூய்மையாகப் பராமரிக்க அனைவருக்கும் விழிப்புணா்வை ஏற்படுத்த வேண்டும் என்றாா் அவா்.

கூட்டத்தில், மாவட்ட ஊரக வளா்ச்சி முகமைத் திட்ட இயக்குநா் ஜி. லோகநாயகி உள்ளிட்டோா் பங்கேற்றனா்.