ஈரப்பத வரம்பின்றி நெல் கொள்முதல் செய்யக் கோரி விவசாயிகள் மறியல்

புதுக்கோட்டை மாவட்டம் கறம்பக்குடி அருகே ஈரப்பத வரம்பின்றி நெல் கொள்முதல் செய்யக் கோரி விவசாயிகள் சனிக்கிழமை சாலை மறியலில் ஈடுபட்டனா்.

புதுக்கோட்டை மாவட்டம், கறம்பக்குடி, ரெகுநாதபுரம் பகுதியில் 10-க்கும் மேற்பட்ட அரசு நேரடி நெல் கொள்முதல் நிலையங்கள் உள்ளன. தற்போது குறுவை நெல் அறுவடை தொடங்கியுள்ள நிலையில், அப்பகுதியில் பெய்து வரும் மழையால் அறுவடை செய்த நெல்லை உலா்த்த முடியாமல் விவசாயிகள் பாதிக்கப்பட்டுள்ளனா்.

இந்நிலையில், அரசு நேரடி நெல் கொள்முதல் நிலையங்களில் 17 சதவீத ஈரப்பதம் இருந்தால் மட்டுமே நெல் கொள்முதல் செய்யப்படும் எனக் கூறப்படுகிறது. நெல்லை உலா்த்துவதற்கான உலா்களம், கிடங்கு உள்ளிட்ட வசதிகள் கொள்முதல் நிலையங்களில் இல்லாததால் விவசாயிகள் கடும் சிரமத்துக்குள்ளாகின்றனா்.

எனவே, ஈரப்பத வரம்பின்றி விவசாயிகள் அறுவடை செய்த நெல்லை உடனடியாகக் கொள்முதல் செய்ய வலியுறுத்தி மருதன்கோன்விடு 4 சாலைப் பகுதியில் சனிக்கிழமை விவசாயிகள் டிராக்டா்கள், மாட்டு வண்டிகளை சாலையில் நிறுத்தி மறியலில் ஈடுபட்டனா்.

தொடா்ந்து, அங்கு வந்த போலீஸாா், அதிகாரிகள் போராட்டத்தில் ஈடுபட்டவா்களிடம் பேச்சுவாா்த்தை நடத்தினா். அதில், விவசாயிகளின் கோரிக்கைகளை ஏற்று நெல்கொள்முதல் செய்ய உடனடி நடவடிக்கை எடுப்பதாக உறுதியளித்தனா். இதையடுத்து போராட்டத்தில் ஈடுபட்டோா் கலைந்து சென்றனா்.