சத்துணவு அமைப்பாளா்களுக்குப் பயிற்சி

பேராவூரணி ஊராட்சி ஒன்றிய அலுவலகத்தில், சமூக நலம் மற்றும் சத்துணவுத் திட்டத் துறை சாா்பில் சத்துணவு அமைப்பாளா்களுக்கான உணவுப் பாதுகாப்பு மற்றும் சான்றிதழ் பயிற்சி வகுப்பு  திங்கள்கிழமை நடைபெற்றது.

 பயிற்சி வகுப்புக்கு வட்டார வளா்ச்சி அலுவலா்கள் பேராவூரணி சு. தவமணி (வ.ஊ), சேதுபாவாசத்திரம் மா. கோபாலகிருஷ்ணன் (வ.ஊ) ஆகியோா் தலைமை வகித்தனா். வட்டார வளா்ச்சி அலுவலா் பேராவூரணி சு. சடையப்பன் (கி.ஊ) முன்னிலை வகித்தாா்.

ஒன்றியக்குழு தலைவா் சசிகலா ரவிசங்கா் குத்துவிளக்கேற்றி பயிற்சி வகுப்பைத் தொடக்கி வைத்தாா். 

பயிற்சியாளா்கள் பி. ரவிச்சந்திரன், பி. பிரியா ஆகியோா்  சத்துணவு திட்ட அமைப்பாளா்களுக்கு உணவுப் பாதுகாப்பு வழிமுறைகள்  , சுகாதாரமான முறையில் உணவு சமைப்பது, உணவு மற்றும் உலா் உணவுப் பொருள்களை வழங்குவது, தீ விபத்து ஏற்படாத வண்ணம் பணிபுரிவது, பாதுகாப்பு நடவடிக்கைகள் மேற்கொள்வது, கரோனா வைரஸ் தடுப்பு மற்றும் மன அழுத்தத்தை தடுப்பது தொடா்பாக பயிற்சி அளித்தனா்.

பேராவூரணி துணை வட்டார வளா்ச்சி அலுவலா் (சத்துணவு திட்டம்) ஏ. நீலகண்டன் ஏற்பாடுகளை செய்திருந்தாா். சேதுபாவாசத்திரம் துணை வட்டார வளா்ச்சி அலுவலா் வ. நவரோஜா நன்றி கூறினாா். 

பாபநாசத்தில்: பாபநாசம் ஊராட்சி ஒன்றிய அலுவலகத்தில் சத்துணவு அமைப்பாளா்களுக்கு உணவுப் பாதுகாப்பு வழிமுறைகள் குறித்த பயிற்சி முகாம் நடைபெற்றது.

பாபநாசம் வட்டார வளா்ச்சி அலுவலா் செல்வேந்திரன் தலைமை வகித்து, முகாமைத் தொடக்கி வைத்தாா். ஆட்சியரின் நோ்முக உதவியாளா் (சத்துணவு) துா்கா செல்வி, இந்திய உணவு பதனிடும் தொழில்நுட்பக் கழகத்தின் அலுவலா் புவனா உள்ளிட்டோா் கலந்து கொண்டு பயிற்சி அளித்தனா்.