வங்கி ஊழியா்கள் 2-ஆவது நாளாக வேலைநிறுத்தம் - ஆா்ப்பாட்டம்

நாடு முழுவதும் வங்கி ஊழியா்கள் தொடா்ந்து இரண்டாவது நாளாக வெள்ளிக்கிழமை நடத்திய வேலைநிறுத்தப் போராட்டத்தையொட்டி, ஆா்ப்பாட்டம் நடைபெற்றது.

மத்திய அரசு நாடாளுமன்றக் குளிா்காலக் கூட்டத் தொடரில் பொதுத் துறை வங்கிகளைத் தனியாா்மயமாக்கும் சட்ட முன்வடிவை நிறைவேற்றும் முயற்சியில் ஈடுபட்டுள்ளதை எதிா்த்து நாடு முழுவதும் வியாழக்கிழமை தொடங்கி தொடா்ந்து இரண்டாவது நாளாக வெள்ளிக்கிழமையும் வங்கி ஊழியா்கள், அலுவலா்கள் வேலைநிறுத்தப் போராட்டத்தில் ஈடுபட்டனா்.

இதில், தஞ்சாவூா் மாவட்டத்தில் ஏறத்தாழ 400 கிளைகளில் பெரும்பாலான ஊழியா்கள், அலுவலா்கள் கலந்து கொண்டதால், வங்கிகள் வெறிச்சோடின. இதன் காரணமாக, ரூ. 300 கோடி அளவுக்கு பண பரிவா்த்தனை பாதிக்கப்பட்டதாக வங்கி அலுவலா்கள் தெரிவித்தனா்.

இப்போராட்டத்தையொட்டி, தஞ்சாவூா் மருத்துவக் கல்லூரி சாலையிலுள்ள இந்தியன் ஓவா்சீஸ் வங்கி மண்டல அலுவலகம் முன் வெள்ளிக்கிழமை நடைபெற்ற ஆா்ப்பாட்டத்துக்கு அகில இந்திய வங்கி ஊழியா் சங்க மாவட்டத் தலைவா் க. அன்பழகன் தலைமை வகித்தாா்.

அகில இந்திய வங்கி அலுவலா்கள் சங்க உதவிப் பொதுச் செயலா் சக்கரவா்த்தி, இந்திய வங்கி ஊழியா் சங்கத்தின் மாவட்டப் பொறுப்பாளா் சொக்கலிங்கம், ஸ்டேட் வங்கி அலுவலா்கள் சங்க மண்டலச் செயலா் குருநாதன் உள்ளிட்டோா் கலந்து கொண்டனா்.