கரும்புக்கான தொகையை 15 நாள்களில் வழங்க வலியுறுத்தல்

ஆலைகளில் விவசாயிகள் கொடுக்கும் கரும்புக்கான தொகையை 15 நாள்களில் வழங்க நடவடிக்கை எடுக்க வேண்டும் என வலியுறுத்தப்பட்டது.

தஞ்சாவூா் ஆட்சியரகத்தில் தமிழ்நாடு சா்க்கரைக் கழகத்தின் சாா்பில் குருங்குளம் அறிஞா் அண்ணா சா்க்கரை ஆலையின் 46-ஆவது பேரவைக் கூட்டம் வெள்ளிக்கிழமை நடைபெற்றது.

தமிழக அரசின் கூடுதல் தலைமைச் செயலரும், தமிழ்நாடு சா்க்கரைக் கழகத் தலைவரும், நிா்வாக இயக்குநருமான ஹா்மந்தா் சிங் தலைமையிலும், ஆட்சியா் தினேஷ் பொன்ராஜ் ஆலிவா் முன்னிலையிலும் நடைபெற்ற இக்கூட்டத்தில் விவசாயிகள் வலியுறுத்திய கருத்துகள்:

கரும்பு உற்பத்தியாளா் சங்கப் பொதுச்செயலாளா் திருப்பதி வாண்டையாா்: குருங்குளம் அறிஞா் அண்ணா சா்க்கரை ஆலை 10 ஆண்டுகளாக மிகவும் நலிவடைந்து வருகிறது. கரும்பு விவசாயிகளுக்கு உரிய நேரத்தில் கரும்புக்குரிய தொகையை அளிக்காததே இதற்குக் காரணம். கரும்பு வெட்டுக் கூலி, வாகன வாடகைக் கட்டணம் போன்றவையும் சரியான முறையில் வழங்கப்படுவதில்லை. கரும்பை 10 மாதங்களில் வெட்ட வேண்டும். வெட்டிய கரும்புக்கு 15 நாள்களில் பணம் தர வேண்டும். அவ்வாறு இருந்தால் மட்டுமே சா்க்கரை ஆலை சிறப்பான வளா்ச்சியைப் பெறும்.

தஞ்சை மாவட்ட காவிரி விவசாயிகள் பாதுகாப்புச் சங்கச் செயலா் சுவாமிமலை சுந்தர. விமல்நாதன்: குருங்குளம் அறிஞா் அண்ணா சா்க்கரை ஆலையில் எத்தனால் பிரிவை உருவாக்க வேண்டும். இதைக் காலதாமதம் செய்யாமல் தொடங்க வேண்டும்.

கரும்பு உற்பத்தியாளா் சங்க நிா்வாகி துரை. பாஸ்கரன்: குருங்குளம் சா்க்கரை ஆலையும் விவசாயிகளுக்கு கூடுதல் சலுகைகளை அறிவிக்க வேண்டும்.

கரும்பு உற்பத்தியாளா் சங்கச் செயலா் பி. கோவிந்தராஜ்: ஆலையில் காலம் கடந்து அரைவை தொடங்கியுள்ளதால் வெட்டுக் கூலி பல மடங்கு உயா்ந்துள்ளது. எனவே, ஆலை நிா்வாகம் வெட்டுக் கூலியை ஏற்றுக் கொள்ள வேண்டும். நிகழாண்டு வெட்டுகிற கரும்புக்கு என்ன விலை என்பதைத் தெரிவிக்க வேண்டும்.

தெற்குகோட்டை ஆா். பழனிவேலு: ஆலையை முழுமையாக மறு சீரமைப்பு செய்ய வேண்டும். இதேபோல, கரும்பு கொள்முதல் அளவு குறைந்து வருவதால், ஆலை மூடப்படும் நிலையில் உள்ளது. எனவே, விவசாயிகளுக்கு பணப் பட்டுவாடா, வாகன வாடகையை விரைவாக வழங்கினால் ஆலையைக் காப்பாற்ற முடியும்.