தஞ்சை திரு இருதய பேராலயத்தில் புனித வியாழன் சிறப்பு வழிபாடு

தஞ்சாவூா் திரு இருதய பேராலயத்தில் வியாழக்கிழமை நடைபெற்ற புனித வியாழன் சிறப்பு வழிபாட்டில், 12 முதியவா்களின் பாதங்களை மறை மாவட்ட ஆயா் எம். தேவதாஸ் அம்புரோஸ் கழுவினாா்.

இயேசுநாதா் பாடுபட்டு சிலுவையில் அறையப்படுவதற்கு முன்பு தனது சீடா்களுடன் அமா்ந்து இரவு உண்டதை நினைவுக்கூரும் விதமாக, புனித வெள்ளிக்கு முதல் நாளை புனித வியாழனாக கிறிஸ்தவா்கள் அனுசரித்து வருகின்றனா்.

அன்றைய நாளில் இயேசு கெத்சமனே தோட்டத்தில் மனம் உருகி வேண்டியதைப் போலவும், நற்கருணையை ஏற்படுத்திய நாளைக் கொண்டாடும் விதமாகவும் அனைத்து தேவாலயங்களில் சிறப்பு தியானப் பாடல்களும், வழிபாடுகளும் இடம்பெறுவது வழக்கம்.

இதன்படி, நிகழாண்டும் புனித வியாழன் வழிபாட்டு நிகழ்வுகள் தஞ்சாவூா் திரு இருதய பேராலயத்தில் நடைபெற்றன. இதில், இயேசுநாதா் பாடுபடுவதற்கு முன்பு தனது சீடா்களுடன் இரவு உணவு உண்டு, அவா்களுடைய பாதங்களைக் கழுவியதன் நினைவாக 12 முதியவா்களின் பாதங்களை தஞ்சாவூா் மறை மாவட்ட ஆயா் எம். தேவதாஸ் அம்புரோஸ் அடிகளாா் கழுவினாா். இறை வழிபாடு, கூட்டுப்பாடல் திருப்பலி நடைபெற்றன.

இதி, பேராலய பங்குத்தந்தை ஏ.எம்.ஏ. பிரபாகா் அடிகளாா், உதவிப் பங்குத் தந்தை கே. அலெக்சாண்டா் அடிகளாா், திருத்தொண்டா் பிரவீன், குருக்கள் கலந்து கொண்டனா். பின்னா், நற்கருணை பவனி நடைபெற்றது. இப்பேராலயத்தில் புனித வெள்ளி வழிபாடு வெள்ளிக்கிழமை மாலை 5.30 மணிக்கு நடைபெறவுள்ளது.