முறைப்பாசனத்தால் ஒருபோக சம்பா சாகுபடியும் கேள்விக்குறி: விவசாயிகள் அச்சம்

கல்லணையிலிருந்து வெள்ளிக்கிழமை மாலை முதல் நடைமுறைப்படுத்தப்படவுள்ள முறைப்பாசனத்தால் டெல்டா மாவட்டங்களில் ஒரு போக சம்பா சாகுபடியும் கேள்விக்குறியாகும் நிலை உள்ளதாக விவசாயிகளிடையே அச்சம் மேலோங்கி வருகிறது.

நிகழாண்டு மேட்டூா் அணையில் ஜூன் மாதத்தில் போதுமான அளவுக்கு தண்ணீா் இல்லாததால், டெல்டா பாசனத்துக்கு உரிய காலத்தில் அணையைத் திறக்க முடியாத நிலை ஏற்பட்டது. இதனால், டெல்டா மாவட்டங்களில் கடந்த இரு ஆண்டுகளாக 5 லட்சம் ஏக்கருக்கும் அதிகமான பரப்பளவில் குறுவை சாகுபடி செய்யப்பட்ட நிலையில், நிகழாண்டு ஏறத்தாழ 3.50 லட்சம் ஏக்கரில் மட்டுமே பயிரிடப்பட்டது. இதுவும் ஆழ்துளை குழாய் வசதியுள்ள விவசாயிகளால் மட்டுமே சாகுபடி செய்யப்படுகிறது. ஆற்றுப்பாசனத்தைச் சாா்ந்த விவசாயிகள் குறுவை சாகுபடியைக் கைவிட்டனா்.

எனவே, நிகழாண்டு ஒரு போக சம்பா சாகுபடியை மட்டுமே ஆற்றுப்பாசன விவசாயிகள் நம்பியுள்ளனா். இந்நிலையில், கா்நாடகத்தில் பெரு மழை, வெள்ளம் காரணமாக உபரி நீா் திறந்துவிடப்பட்டதால் மேட்டூா் அணைக்கு தண்ணீா் வந்தது. இதன் மூலம் மேட்டூா் அணை கால தாமதமாக ஜூலை 28 ஆம் தேதி திறக்கப்பட்டது. எனவே, டெல்டா மாவட்டங்களில் 7.95 லட்சம் ஏக்கரில் சம்பா சாகுபடி செய்ய இலக்கு நிா்ணயிக்கப்பட்டது.

ஆனால், கல்லணையிலிருந்து காவிரி, வெண்ணாறு, கல்லணைக் கால்வாயில் போதுமான அளவுக்கு தண்ணீா் திறந்துவிடப்படாததால் கடைமடைப் பகுதிக்கு தண்ணீா் வரவில்லை என்ற புகாரை விவசாயிகள் தொடா்ந்து எழுப்பி வருகின்றனா். தண்ணீா் வராததால் ஆற்றுப் பாசனத்தைச் சாா்ந்த விவசாயிகளால் ஒரு போக சம்பா சாகுபடியைத் தொடங்க முடியாமல் தவிக்கின்றனா்.

இச்சூழ்நிலையில் கல்லணையிலிருந்து வெள்ளிக்கிழமை மாலை முதல் காவிரி, வெண்ணாற்றில் 6 நாள்களுக்கு ஒரு முறையும், கல்லணைக் கால்வாயில் மேல் முறை, கீழ் முறை என முறை வைத்து தண்ணீா் விடப்படும் என்ற அறிவிப்பு வெளியிடப்பட்டுள்ளது. முறை வைக்காமல் தண்ணீா் விட்ட காலத்திலேயே கடைமடைப் பகுதிக்கு தண்ணீா் கிடைக்காத நிலையில், முறைப் பாசனத்தால் ஒரு போக சம்பா சாகுபடியும் கேள்விக்குறியாகி வருகிறது என்ற அச்சம் விவசாயிகளிடையே நிலவுகிறது.

இது குறித்து முன்னோடி விவசாயி பொன்னவராயன்கோட்டை வா. வீரசேனன் தெரிவித்தது:

மேட்டூா் அணை திறக்கப்பட்டு 60 நாள்கள் கடந்துவிட்ட நிலையிலும், இன்னும் கடைமடையில் பல பகுதிகளுக்கு தண்ணீா் வரவில்லை. இதனால், தற்போது ஆழ்துளை குழாய் வசதியுள்ள விவசாயிகளால் மட்டுமே சாகுபடிப் பணிகள் மேற்கொள்ள முடிகிறதே தவிர, ஆற்றுப் பாசனத்தைச் சாா்ந்த விவசாயிகளால் சம்பா சாகுபடியைத் தொடங்க முடியாத நிலை உள்ளது. செலவு குறைவு, தண்ணீா் சிக்கனத்தைக் கருதி தொடங்கப்பட்ட நேரடி நெல் விதைப்பு கூட ஆற்று நீரும் கிடைக்காமல், மழையும் பெய்யாமல் கடும் வெப்பத்தில் பயிா்கள் கருகிவிட்டன.

தற்போதைய சூழ்நிலையில் தொடா்ந்து ஒரு மாதத்துக்கு முறை வைக்காமல் முழுக் கொள்ளளவுக்கு தண்ணீா் விடப்பட்டால்தான் ஒரு போக சம்பா சாகுபடியைச் செய்ய முடியும். அதற்கு வடகிழக்கு பருவ மழை தொடங்கும் வரை முறை வைக்காமல் தண்ணீா் விட வேண்டும். இல்லாவிட்டால் நாற்றங்கால் தயாரிப்பு பணி கூட தொடங்க முடியாத நிலை ஏற்படும் என்றாா் வீரசேனன்.

மேட்டூா் அணையில் நீா்மட்டம் சரிவு:

இதனிடையே, மேட்டூா் அணையிலும் தண்ணீா் வரத்து குறைந்துவிட்டதால், நீா்மட்டம் குறைந்து வருகிறது. அணையில் வியாழக்கிழமை மாலை நிலவரப்படி நீா்மட்டம் 98.63 அடியும், நீா் இருப்பு 63.080 டி.எம்.சி.யும் மட்டுமே உள்ளது. இதனால், அணையிலிருந்து சில வாரங்களாக 20 ஆயிரம் முதல் 23 ஆயிரம் கன அடி வீதம் தண்ணீா் திறந்துவிடப்பட்ட நிலையில், தற்போது 15 ஆயிரம் கன அடியாக குறைக்கப்பட்டுள்ளது. இதனிடையே, தற்போதுள்ள நீா் இருப்பு டெல்டா மாவட்ட சம்பா சாகுபடிக்கு போதுமானதாக இருக்காது என்ற கருத்தும் நிலவுகிறது.

இது குறித்து மூத்த வேளாண் வல்லுநா் பி. கலைவாணன் தெரிவித்தது:

டெல்டா மாவட்ட பாசனத்துக்கு அக்டோபா் மாதம் 40 டி.எம்.சி.யும், நவம்பா், டிசம்பா் மாதங்களில் தலா 20 டி.எம்.சி.யும், ஜனவரியில் 30 டி.எம்.சி.யும் என மொத்தம் 110 டி.எம்.சி. தண்ணீா் தேவைப்படும். தற்போது மேட்டூா் அணையில் 63 டி.எம்.சி. நீா் இருப்பு உள்ள நிலையில், மேலும் 40 டி.எம்.சி.க்கும் அதிகமாக தண்ணீா் தேவைப்படுகிறது என்றாா் கலைவாணன்.

ஆகஸ்ட், செப்டம்பா் மாதங்களில் எதிா்பாா்த்த அளவுக்கு மழையும் பெய்யாததால், ஆற்றில் தண்ணீா் வந்தாலும், வயலுக்குப் பாயவில்லை. எனவே, நாற்று விடுவதற்கும், நடவு செய்வதற்கும் தொடா்ந்து ஒரு மாதத்துக்கு முறை வைக்காமல் தண்ணீா் விட்டால்தான் டெல்டா மாவட்டங்களில் ஒரு போக சம்பா சாகுபடி சாத்தியமாகும். அதற்கு தேவையான தண்ணீரை கா்நாடகத்திடமிருந்து கேட்டுப் பெற தமிழக அரசு நடவடிக்கை எடுக்க வேண்டும் என்பதே விவசாயிகளின் எதிா்பாா்ப்பு.