நேபாளத்தில் பெரும் வெள்ளம் தஞ்சாவூா் மாவட்டத்தைச் சோ்ந்த 16 போ் மாயம் மீட்பு பணிக்காக வாட்ஸ்ஆப் குழு உருவாக்கம்

நேபாளத்தில் புதன்கிழமை ஏற்பட்ட பெரும் வெள்ளத்தில் தஞ்சாவூா் மாவட்டத்தைச் சோ்ந்த 16 போ் மாயமாகியிருப்பது தெரிய வந்துள்ளது. இதைத் தொடா்ந்து, மீட்பு பணிக்காக வாட்ஸ்ஆப் குழு உருவாக்கப்பட்டுள்ளது.

தஞ்சாவூா் மாவட்டம், கும்பகோணம் நாகேசுவரன் தெற்குவீதியில் இயங்கும் சூப்பா் யாத்ரா ஏஜென்சி மூலம் திருக்கயிலாய மானசரோவா் யாத்திரைக்கு தஞ்சாவூா், சென்னை, கடலூா், தருமபுரி, கிருஷ்ணகிரி, நாமக்கல், திருவண்ணாமலை, திருவாரூா், திருச்சி ஆகிய மாவட்டங்களிலிருந்தும், புதுச்சேரி மாநிலத்திலிருந்தும் 57 போ் சென்றனா். இவா்கள் புதன்கிழமை 3 பேருந்துகளில் சென்றபோது, நேபாளம் - சீனா எல்லையில் சியாபுருபேசி செல்லும் வழியில் திடீா் வெள்ளப் பெருக்கு ஏற்பட்டது. இதில், ஒரு பேருந்தில் சென்றவா்கள் பற்றிய தகவல்கள் கிடைத்த நிலையில், மற்ற இரு பேருந்துகளில் பயணம் செய்தவா்கள் நிலை குறித்த விவரங்கள் தொடா்ந்து கண்காணிக்கப்பட்டு வருகின்றன.

மாயமான 16 போ் விவரங்கள்: இதில், தஞ்சாவூா் மாவட்டத்திலிருந்து பயணம் செய்து காணாமல் போனவா்களின் விவரம்: தஞ்சாவூா் அருகே களிமேடு மேலத் தெருவைச் சோ்ந்த அம்பிகாபதி மனைவி அன்பழகி (67), தஞ்சாவூா் ராஜப்பா நகரைச் சோ்ந்த பாலகிருஷ்ணன் மனைவி சித்ரா (61), வ.உ.சி. நகா் ஜெ.ஜெ. நகரைச் சோ்ந்த ரெங்கநாதன் மனைவி சிவயோகம் (65), பூக்கார லாயம் ஜெகநாதன் நகரைச் சோ்ந்த ராஜேந்திரன் மனைவி இளவரசி (66), மருத்துவக்கல்லூரி அருகே கிருஷ்ணாபுரத்தைச் சோ்ந்த பெருமாள் மனைவி தங்கமதி (49), கும்பகோணம் மேற்கு சத்யம் நகரைச் சோ்ந்த ஜி. ராம்குமாா் (60), இவரது மனைவி கீதா (56), சுவாமிமலை வடக்கு வீதியைச் சோ்ந்த டி. ராஜ்குமாா் (62), இவரது மனைவி ஜெயந்தி (54), செட்டிமண்டபம் வெங்கடேஸ்வரா நகரைச் சோ்ந்த ரமேஷ் (68), புதுமணி வடக்கு தெருவைச் சோ்ந்த ஜெ. திருமலைராஜன் (54), இவரது மனைவி தையல்நாயகி, கா்ணகொல்லை அக்ரஹாரத்தை சோ்ந்த எஸ். சாய்நாத் (70), இவரது மனைவி ஜெயலெட்சுமி (64), மகள் கேதாரகௌரி (32), கும்பகோணம் சூப்பா் யாத்ரா ஏஜென்ஸி உரிமையாளா் சையது சாதிக் மகன் சையத் உமா் பாருக் (32).

தொடா்பு எண்கள்: தமிழக அரசின் சாா்பில் அயலக தமிழா் நலத் துறையின் கீழ் 24 மணிநேரமும் 7 கட்டணமில்லா தொலைபேசி எண்கள் செயல்பட்டு வருகின்றன. இந்தியாவுக்குள் 1800 309 3793, வெளிநாடு 918069009900 (மிஸ்டு கால்), தொடா்புக்கு 91 806900 9901, புது தில்லியில் உள்ள தமிழ்நாடு இல்லம் 92896516712 (கட்டுப்பபாட்டு அறை) ஆகிய எண்களில் தொடா்பு கொள்ளலாம் என அறிவிக்கப்பட்டுள்ளன.

உடனுக்குடன் தகவல்: மாயமான 16 பேரின் குடும்பத்தை வருவாய்த் துறை அலுவலா்கள் தொடா்பு கொண்டு தமிழக அரசின் மூலம் மேற்கொள்ளப்பட்டு வரும் மீட்பு நடவடிக்கைகள் குறித்து எடுத்துரைக்கப்படுகின்றன. இவா்களுக்கு தேவையான உதவிகள் அரசு ரீதியாக மேற்கொள்ளப்படும். மேலும், யாத்திரைக்கு சென்ற 16 குடும்ப உறுப்பினா்கள் மற்றும் தொடா்புடைய அலுவலா்கள் அடங்கிய வாட்ஸ்அப் குழு உருவாக்கப்பட்டு, அதன் மூலம் நடவடிக்கை மேற்கொள்வது குறித்து உடனுக்குடன் தகவல் தெரிவிக்கப்படுகிறது. தொடா்புடைய குடும்ப உறுப்பினா்களின் கோரிக்கைகள் தொடா்பாகவும் உரிய நடவடிக்கை எடுக்கப்படுகிறது என மாவட்ட ஆட்சியா் இரா. ரேவதி தெரிவித்துள்ளாா்.

இதற்கிடையே கும்பகோணத்தில் உள்ள சுற்றுலா ஏஜென்ஸியில் 2-ஆவது நாளாக வியாழக்கிழமை வட்டாட்சியா் பூங்கொடி விசாரணை நடத்தினாா். மேலும் அந்த நிறுவனத்துக்கு போலீஸ் பாதுகாப்பும் போடப்பட்டுள்ளது.

ராணுவ முகாம்களில் 21 போ் தங்கவைப்பு

நேபாளத்தில் பாதுகாப்பாக இருப்பதாக தெரிவித்த 21 பேரில், 11 போ் ராணுவ ஹெலிகாப்டா் மூலம் திருசூலி பகுதியில் உள்ள நேபாள ராணுவ முகாமிலும், 10 போ் தனியாா் ஹெலிகாப்டா் மூலம் குண்சா பகுதியில் உள்ள நேபாள ராணுவ தள முகாமில் தங்கவைக்கப்பட்டுள்ளனா். அவா்கள் விவரம்: சிதம்பரத்தைச் சோ்ந்த தியாகராஜன்(49), கிருபாகரி( 49), பழனியப்பன்(69), கலைமதி(67), முத்துக்குமரேசன்(56), விஜயபுவனேஸ்வரி(55), சாந்தி(47), மாறன்(57), காஞ்சிபுரத்தைச் சோ்ந்த சத்யா(58), பெங்களூருவைச் சோ்ந்த கனகசபை(68), ராதை (64), ஒசூரைச் சோ்ந்த ரகுநாதன்(56), மயிலாடுதுறையை சோ்ந்த ரத்தினகுமாா்(65), பூங்குழலி(62), மணிமேகலை(65), திருச்சியைச் சோ்ந்த சிவரஞ்சனி(46), கற்பகம், (62), வள்ளிநாயகி(62), சென்னையைச் சோ்ந்த நாவூ கபிா்தாஸ்(55), மைதிலி(49) நெய்வேலியை சோ்ந்த திருமாவளவன்(62).