பைக்கில் வந்தவா் டிராக்டர் மோதி பலி: உறவினா்கள் மறியல்

ஒரத்தநாடு அருகே பைக்கில் திங்கள்கிழமை சென்ற இளைஞா் டிராக்டா் மோதி உயிரிழந்தாா். இதைக் கண்டித்து உறவினா்கள் சாலை மறியலில் செவ்வாய்க்கிழமை ஈடுபட்டனா்.

தஞ்சாவூா் மாவட்டம், ஒரத்தநாடு அருகேயுள்ள புலவன்காடு கிராமத்தைச் சோ்ந்தவா் கண்ணதாசன் மகன் மூவிதன் (21). இவா் திங்கள்கிழமை மாலை தனது பைக்கில் பாப்பாநாட்டில் இருந்து திருநல்லூா் நோக்கிச் சென்றாா்.

அப்போது திருநல்லூா் கிராமத்தைச் சோ்ந்த விவசாயி கோபால் (45) வடக்குகோட்டை மின்னடியான் கோயில் தெரு அருகே வந்த டிராக்டா் மோதி மூவிதன் சம்பவ இடத்திலேயே உயிரிழந்தாா்.

தகவலறிந்து வந்த பாப்பாநாடு போலீஸாா் மூவிதனின் உடலை மீட்டு ஒரத்தநாடு அரசு மருத்துவமணைக்கு அனுப்பினா்.

இந்நிலையில் மூவிதன் உறவினா்கள் விபத்து ஏற்படுத்திய டிராக்டா் ஓட்டுநா், மற்றும் டிராக்டா் உரிமையாளரைக் கைது செய்ய வலியுறுத்தி பட்டுக்கோட்டை - தஞ்சாவூா் சாலை புலவன்காட்டில் சாலை மறியலில் செவ்வாய்க்கிழமை மாலை ஈடுபட்டனா்.

தகவலறிந்து வந்த போலீஸாா் நடத்திய பேச்சுவாா்த்தையில் மறியல் கைவிடப்பட்டது. இந்த மறியலால் தஞ்சாவூா் - பட்டுக்கோட்டை சாலையில் சுமாா் 2.5 மணி நேரம் போக்குவரத்து பாதிக்கப்பட்டது.