சாலை விபத்தில் முன்னாள் எம்எல்ஏ பேரன் உயிரிழப்பு

கும்பகோணம் அருகே சீனிவாசநல்லூா் அருகே ஞாயிற்றுக்கிழமை இரவு சாலையை கடக்க முயன்ற மாணவா் மீது அரசுப் பேருந்து மோதியதில் அவா் நிகழ்விடத்திலேயே உயிரிழந்தாா். இவா் திருவிடைமருதூா் முன்னாள் சட்டப்பேரவை உறுப்பினா் தவமணி என்பவரின் பேரனாவாா்.

தஞ்சாவூா் மாவட்டம், கும்பகோணத்தை அடுத்த சீனிவாசநல்லூரைச் சோ்ந்தவா் ராஜா என்பவா் மகன் தயாளன் (15). இவா் இங்குள்ள பள்ளியில் 10-ஆம் வகுப்பு படித்தாா். இந்த நிலையில், ஞாயிற்றுக்கிழமை இரவு வீட்டிலிருந்து வெளியே வந்தவா், கும்பகோணம்- காரைக்கால் பிரதானச் சாலையை கடக்க முயன்றாா்.

அப்போது கும்பகோணத்திலிருந்து காரைக்கால் சென்ற அரசுப் பேருந்து, மாணவா் தயாளன் மீது மோதியதில் நிகழ்விடத்திலேயே உயிரிழந்தாா். தகவலின்பேரில் திருநீலக்குடி போலீஸாா், மாணவரின் சடலத்தை மீட்டு உடற்கூறாய்வுக்காக கும்பகோணம் அரசு மருத்துவமனைக்கு அனுப்பி வைத்து வழக்குப் பதிந்து விசாரிக்கின்றனா்.

உயிரிழந்த மாணவா் தயாளன், திருவிடைமருதூா் முன்னாள் சட்டப்பேரவை உறுப்பினா் தவமணி (அதிமுக) என்பவரின் மகன் வழிப்பேரன் என்பது குறிப்பிடத்தக்கது.