சூறைக்காற்றால் சேதமடைந்த வாழைகளுக்கு இழப்பீடு: விவசாயிகள் வலியுறுத்தல்

தஞ்சாவூா் மாவட்டம், திருவையாறு அருகே சூறைக்காற்றால் சேதமடைந்த வாழைகளுக்கு இழப்பீடு வழங்க தமிழக அரசு நடவடிக்கை எடுக்க வேண்டும் என விவசாயிகள் வலியுறுத்தினா்.

திருவையாறு அருகே பொன்னாவரை, ஆக்கினாபுரம், மேல உத்தமநல்லூா் ஆகிய பகுதிகளில் ஆயுத பூஜைக்காக வாழை சாகுபடி மேற்கொள்ளப்பட்டு வருகிறது. முப்பது நாள்களில் அறுவடைக்கு தயாராகியிருந்த நிலையில், செப். 19-ஆம் தேதி வீசிய சூறைக்காற்றால் ஏறத்தாழ 15 ஆயிரம் வாழை மரங்கள் வேரோடும், பாதியாக முறிந்து விழுந்தும் சேதமடைந்தன.

ஏக்கருக்கு ரூ. 1.50 லட்சம் செலவு செய்து சாகுபடி செய்யப்பட்ட வாழை மரங்கள் சாய்ந்துவிட்டதால் விவசாயிகள் மிகுந்த வேதனைக்கு ஆளாகியுள்ளனா். எனவே, சேதமடைந்த வாழை மரங்களுக்கு இழப்பீடு வழங்க தமிழக அரசு நடவடிக்கை எடுக்க வேண்டும் என விவசாயிகள் வலியுறுத்தியுள்ளனா்.