சிறுகனூர் அருகே கார் கவிழ்ந்த  விபத்தில் தாய், மகன் சாவு

சிறுகனூர் அருகே கார் கவிழ்ந்த விபத்தில் தாய், மகன் புதன்கிழமை உயிரிழந்தனர். 
திருச்சி மாவட்டம், சமயபுரம் அருகே ச.புதூரைச் சேர்ந்தவர் மூக்கன்(65). விவசாயியான இவர் தனது மனைவி வசந்தா(54), 
மகன் அரவிந்தன்(27) ஆகியோருடன் பெரம்பலூர் அருகே சிறுவாச்சூரில் உடல்நலம் குன்றிய உறவினரை பார்த்து விட்டு காரில் ஊருக்கு திரும்பிக் கொண்டிருந்தார்.
காரை அரவிந்தன் ஓட்டினார். சென்னை-திருச்சி தேசிய நெடுஞ்சாலையில் பாடாலூர் அருகே நெடுங்கூர் பகுதியில் வந்தபோது காரின் பின்பக்க டயர் வெடித்தது.  இதில் நிலைதடுமாறிய கார் சாலையில் கவிழ்ந்து. 
இதில் அரவிந்தன் நிகழ்விடத்தில் இறந்தார். காயமடைந்த மூக்கன், வசந்தா இருங்களூரில் உள்ள தனியார் மருத்துவக் கல்லூரி மருத்துவமனை ஆராய்ச்சி மையத்தில் சிகிச்சைக்கு அனுமதிக்கப்பட்டனர். 
அங்கு சிகிச்சை பலனின்றி வசந்தா இறந்தார்.  மேல் சிகிச்சைக்காக திருச்சியில் உள்ள தனியார் மருத்துவமனையில் மூக்கன் அனுமதிக்கப்பட்டார். 
விபத்து குறித்து சிறுகனூர் போலீஸாக் வழக்குப் பதிவு செய்து விசாரணை நடத்தி வருகின்றனர்.