தொட்டியம் ஒன்றியக் குழுக் கூட்டத்தில் தீா்மானத்தை ரத்து செய்த தலைவா்

தொட்டியம் ஒன்றியக் குழு வளாகத்திலுள்ள கழிவுநீா் கிணற்றை சுத்தம் செய்ததாகக் கூறி, ரூ.49,802-செலவினத் தொகைக்கு ஒப்புதல் கோரிய தீா்மானத்தை ரத்து செய்தாா் ஒன்றியத் தலைவா் புனிதாராணி.

தொட்டியம் ஒன்றியக் குழுவின் சாதாரணக் கூட்டம் திங்கள்கிழமை நடைபெற்றது. கூட்டத்துக்கு தலைவா் புனிதாராணி தலைமை வகித்தாா். துணைத் தலைவா் சத்தியமூா்த்தி, ஆணையா்கள் பால் அண்ணாதுரை, ஸ்ரீதா் முன்னிலை வகித்தனா்.

ஒன்றியத்தில் மேற்கொள்ளப்பட்ட பணிகளையும், அதற்கான செலவினத் தொகை குறித்தும் மேலாளா் அசோகன் தீா்மானங்களாக வாசித்து வந்தாா்.

பத்தாவது தீா்மானமாக, ஒன்றியக் குழு அலுவலக

வளாகத்திலுள்ள கழிவுநீா் கிணற்றை சுத்தம் செய்தாகக் கூறி, அதற்கான செலவினத் தொகை ரூ.49,802 என வாசித்தாா்.

அப்போது குறுக்கிட்ட துணைத் தலைவா் சத்தியமூா்த்தி, கிணற்றை திறக்காமல் எப்படி சுத்தம் செய்தீா்கள். பசுமை வீடுகள் குறித்து உறுப்பினா்களிடம் ஆலோசனை வழங்காமல் எப்படி வேலை உத்தரவை வழங்கினீா்கள் எனக் கேள்வி எழுப்பினாா். இதற்கு பதிலளிக்க முடியாமல் அலுவலா்கள் திணறினா்.

இதையடுத்து தவறான செலவினத் தொகை எழுதி என்னிடம் கையெழுத்து கேட்காதீா்கள் எனக் கூறி, கழிவுநீா் கிணற்றை சுத்தம் செய்த செலவினத் தொகைக்கான தீா்மானத்தை ரத்து செய்து ஒன்றியக் குழுத் தலைவா் புனிதாராணி கையெழுத்திட்டாா்.

ஒன்றியத்தில் மேற்கொள்ளப்படும் பணிகள் குறித்து தங்களுக்குத் தெரிவிக்க வேண்டும். தன்னிச்சையாக செயல்படக் கூடாது என அலுவலா்களிடம் ஒன்றியக் குழு உறுப்பினா்கள் தெரிவித்தனா்.