எந்த நேரத்திலும் மக்கள் தொண்டாற்றுவேன்: ப. குமாா்

உள்ளூரில் இருப்பதால் எந்த நேரத்திலும் ஓடோடி வந்து மக்கள் தொண்டாற்றுவேன் எனவே, என்னை வெற்றி பெறச் செய்ய வேண்டுமெனக்கூறி இறுதிக் கட்ட பிரசாரம் மேற்கொண்டாா் திருவெறும்பூா் தொகுதி அதிமுக வேட்பாளா் ப. குமாா்.

திருவெறும்பூா்- கல்லணை சாலையில் உள்ள வெள்ளைப் பிள்ளையாா் கோயிலில் தனது இறுதிக்கட்ட பிரசாரத்தை தொடங்கி வேங்கூா், அரசங்குடி, பத்தாளப்பேட்டை, கூத்தைப்பாா் வழியாக மீண்டும் திருவெறும்பூா் பேருந்து நிலையம் மற்றும் கடைவீதியில் பிரசாரத்தை முடித்த அவா் பேசியது:

தான் எம்பி யாக இருந்தபோது மற்ற தொகுதிகளைவிட திருவெறும்பூா் தொகுதிக்கு அதிகமாகச் செய்தேன். நான் மாவட்டச் செயலரானதும் திருவெறும்பூா் பகுதிக்கு சிறப்பு நிதி ரு. 100 கோடியில் சாலை மற்றும் குளம் தூா்வாரும் பணிகள் மேற்கொள்ளப்பட்டுள்ளன. வட்டச்சாலை பணிகள் விரைவில் முடிக்கப்படும், திருச்சி தஞ்சை தேசிய நெடுஞ்சாலையில் பொதுமக்கள் பாதிக்காத வண்ணம் பறக்கும் சாலைத் திட்டம் கொண்டு வரப்படும்.

47 ஏக்கரிலான அரியமங்கலம் குப்பைக் கிடங்கில் தற்போது 10 லட்சம் டன் குப்பை தேங்கியுள்ளது, இதில் மூன்றில் இரு பங்கு அப்புறப்படுத்தபட்டு விட்டது. அதை முழுவதுமாக அப்புறப்படுத்தி பொழுதுபோக்கு அம்சத்துடன் கூடிய வணிக வளாகம் கட்டப்படும். திருவெறும்பூா் அருகே ஒருங்கிணைந்த பேருந்து நிலையம் கொண்டு வரப்படும்.

பெல் நிறுவனத்துக்கு புதிய ஆா்டா்கள் பெற்று தரப்படும். நவல்பட்டு ஐடி நிறுவனத்துக்கு ரூ. 42 கோடியில் புதிய கட்டடங்கள் கட்டப்படும். இந்தப் பகுதி இளைஞா்களுக்கு வேலைவாய்ப்பு ஏற்படுத்திக் கொடுக்கப்படும்.

திருவெறும்பூா் பகுதியில் புதிதாக சோ்க்கப்பட்ட 5 வாா்டுகளுக்கும் புதை சாக்கடைப் பணி முடிந்து விட்டதால் 3 மாதங்களில் அனைத்துப் பகுதியிலும் சாலைகள் அமைத்துத் தரப்படும்.

மேலும் நான் உள்ளூா் நபா் என்பதால், மக்கள் பணியாற்ற எந்த நேரத்திலும் ஓடோடி வருவேன். எனவே அதிமுக நல்லாட்சி அமைய இரட்டை இலைச் சின்னத்தில் வாக்களிக்க வேண்டும் என்றாா் அவா்.

அவருக்கு பல இடங்களில் பொதுமக்கள் ஆரத்தி எடுத்தும், மாலைகள் சால்வைகள் அணிவித்தும் சிறப்பான வரவேற்பு அளித்தனா்.

திருவெறும்பூா் ஒன்றியச் செயலா்கள் ராவணன், கோவிந்தராஜன், பேரூா் கழகச் செயலா் முத்துக்குமாா், துவாக்குடி நகரச் செயலா் பாண்டியன் மற்றும் பாஜக ஒன்றியச் செயலா் சக்திவேல் உட்பட ஏராளமானோா் கலந்து கொண்டனா்.