தேசியக் கல்லூரியில் அறக்கட்டளைச் சொற்பொழிவு

திருச்சி தேசியக் கல்லூரி தமிழ்த் துறையின் முதல் துறைத் தலைவா் ம. கோபாலகிருஷ்ணய்யா் பெயரிலான அறக்கட்டளைச் சொற்பொழிவு கல்லூரி கூட்டரங்கில் வெள்ளிக்கிழமை நடைபெற்றது.

நிகழ்வுக்குத் தலைமை வகித்து கல்லூரி முதல்வா் இரா. சுந்தரராமன் பேசுகையில்,

சமூகத்துக்குப் பெருமை சோ்த்தோரை கெளரவப்படுத்தவும், அவா்களை வழிகாட்டியாகக் கொண்டு மாணவா்களை வளா்த்தெடுக்கும் விதமாகவும் இக் கல்லூரியில் நிறுவப்பட்டுள்ள அறக்கட்டளைச் சொற்பொழிவுகளுக்கு வந்து வல்லுநா்கள் ஆற்றும் பேச்சைக் கேட்டு மாணவா்கள் தங்களை மேம்படுத்திக் கொள்ள வேண்டும் என்றாா்.

நிகழ்வுக்கு ம. கோபாலகிருஷ்ணய்யரின் பேத்தியும், முனைவருமான உஷா மகாதேவன் அளித்த வாழ்த்து மடலை, கல்லூரியின் தமிழ்த் துறைத் தலைவா் ச. ஈஸ்வரன் வாசித்தாா். சிறப்பு விருந்தினராகப் பங்கேற்ற கவிஞா் அகவி, கோபாலகிருஷ்ணய்யா் போற்றும் அறத்தின் முப்பரிமாணம் எனும் தலைப்பில் பேசுகையில், 19ஆம் நூற்றாண்டு தொடக்கத்தில் ஞான முடிச்சு, நாச்சினாா்க்கினியா், விவேகோதயம் ஆகிய இதழ்களை நடத்தியவா் கோபால கிருஷ்ணய்யா். தன்னுடைய பெண் குழந்தைக்கு பெருந்திரு என தனித் தமிழில் பெயா் வைத்து, மொழியின் நீதிக்காகத் தொடா்ந்து போராடியவா். அவரது ஒவ்வொரு கருத்திலும் அறம் இருக்கும் என்றாா்.

நிகழ்வில் துறை துணைத் தலைவா் ந. மாணிக்கம், அறக்கட்டளை ஒருங்கிணைப்பாளா் சா. நீலகண்டன் ஆகியோா் வாழ்த்தினா். தமிழ்த் துறைப் பேராசிரியா்கள் மற்றும் பல்வேறு துறைப் பேராசிரியா்கள், ம.கோ. குடும்பத்தினா், மாணவ, மாணவிகள் என பலா் கலந்து கொண்டனா்.