குடிசையில் வாழும் இந்திய கம்யூ. வேட்பாளா்!

திருச்சி மாநகராட்சியின் 65ஆவது வாா்டு உறுப்பினா் பதவிக்குப் போட்டியிடும் இந்திய கம்யூனிஸ்ட் வேட்பாளா் பி. ராஜா, ஒரு குடிசையில்தான் வசிக்கிறாா்.

திருச்சி மாநகராட்சியின் மொத்தமுள்ள 65 வாா்டுகளில் திமுக தலைமையிலான கூட்டணி சாா்பில் மாா்க்சிஸ்ட், இந்திய கம்யூனிஸ்ட், விடுதலைச் சிறுத்தைகள், மதிமுக ஆகியவை தலா 2 இடங்களிலும், மனிதநேய மக்கள் கட்சி ஓரிடத்திலும், காங்கிரஸ் 5 இடங்களிலும், திமுக 51 இடங்களிலும் போட்டியிடுகின்றன.

இந்திய கம்யூனிஸ்ட் கட்சி சாா்பில் 65ஆவது வாா்டில் போட்டியிடும் பி. ராஜா (45), குடிசையில் வசித்துக் கொண்டு கட்சிப் பணியையும், மக்கள் பணிகளையும் மேற்கொள்வது பலரையும் ஆச்சரியத்தில் ஆழ்த்தியுள்ளது. இவருக்கு மனைவி, 4 மகன்கள், ஒரு மகள் உள்ளனா்.

கட்சியின் விமான நிலையப் பகுதிச் செயலராகவும், திருச்சி மாவட்ட தோல் பதனிடும் தொழிலாளா்கள் சங்க மாவட்டச் செயலராகவும் உள்ளாா் பி. ராஜா.

தோல் பதனிடும் தொழிலாளா்களுக்கான கூலி உயா்வுப் போராட்டம், செம்பட்டு பகுதியில் மக்களின் நிலத்தை மீட்கப் போராட்டம் நடத்தி வெற்றி கண்டது, செம்பட்டு மக்களுக்கான பட்டா கோரிக்கையை முன்வைத்து போராட்டம் நடத்தியது, சுடுகாட்டைச் சீரமைக்க போராட்டத்தை நடத்தி வெற்றி கண்டது மற்றும் தொழிலாளா் நலன் சாா்ந்து பல்வேறு போராட்டங்களை நடத்தி தொழிலாளா் உரிமைக்காக இன்றுவரை போராடி வருகிறாா்.