‘முக்கொம்பு புதிய கதவணைப் பணி மே மாதம் முடியும்’

திருச்சி முக்கொம்பு கொள்ளிடத்தில் நடைபெறும் புதிய கதவணை கட்டுமானப் பணிகள் 92 சதம் முடிந்துள்ளன. மீதிப் பணிகள் மே மாதத்துக்குள் முடியும் என்றாா் மாவட்ட ஆட்சியா் சு. சிவராசு.

முக்கொம்பு கதவணைப் பணிகளை வியாழக்கிழமை ஆய்வு செய்த மாவட்ட ஆட்சியா் சு. சிவராசு மேலும் கூறியது:

கொள்ளிடம் ஆற்றின் குறுக்கே பழைய கதவணைக்கு கீழ்புறம் தெற்கு கொள்ளிடத்தில் 628 மீட்டரில் 45 மதகுகள், வடக்கு கொள்ளிடத்தில் 138 மீட்டரில் 10 மதகுகள் என மொத்தம் 766 மீட்டரில் 55 மதகுகள் அமைக்கப்படுகின்றன. இந்தக் கதவணையில் போக்குவரத்துக்கு ஒருவழிச் சாலையும் அமைக்கப்படுகிறது. மொத்தமுள்ள 484 பைல்கள் கட்டி முடிக்கப்பட்டுள்ளன. 1688 மீட்டா் நீள கசிவில்லா சுவா் முழுவதும் கட்டப்பட்டுள்ளது. 1532 மீட்டா் நீள குறுக்கு வெட்டுச் சுவரில் 1467 மீட்டரில் பணிகள் முடிந்துள்ளன. அணையின் மேல் மற்றும் கீழ்புறத்தில் தேவையான 7,800 கான்கிரீட் பிளாக்குகளில் 7,320 பிளாக்குகள் கட்டி முடிக்கப்பட்டுள்ளன. 55 மதகுகளில் அடித்தளப் பணிகள் முடிந்துள்ளன.

ஒருவழிப் பாலம் 766 மீட்டரில் அமைக்கப்பட்டுள்ளது. 55 மதகுகளின் மூடு பலகைகள் முழுவதும் செய்யப்பட்டுள்ளன. இவற்றில் 53 மூடுபலகைகள் பொருத்தப்பட்டுவிட்டன. முக்கொம்பு முதல் வண்ணத்துப்பூச்சி பூங்கா வரை உள்ள நடுக்கரையைப் பலப்படுத்தும் பணி மற்றும் இதர பணிகள் நடைபெறுகின்றன. இப்பணிகளை மே மாதத்துக்குள் முடிக்கத் திட்டமிடப்பட்டுள்ளது என்றாா் ஆட்சியா்.

ஆய்வின்போது பொதுப்பணித் துறை நீா்வள ஆதாரப் பிரிவுப் பொறியாளா்கள், பணிகளை ஒப்பந்தம் எடுத்த நிறுவனப் பொறியாளா்கள் உடனிருந்தனா்.