18 வகை கல்குவாரி உரிமம்: விண்ணப்பங்கள் வரவேற்பு

திருச்சி மாவட்டத்தில் உள்ள 18 வகையான கல்குவாரிகளின் உரிமங்களைப் பெற விண்ணப்பிக்க ஆட்சியா் சு. சிவராசு அழைப்பு விடுத்துள்ளாா்.

இதுகுறித்து அவா் வெளியிட்ட செய்திக்குறிப்பு:

திருச்சி மாவட்ட அரசு புறம்போக்கு நிலங்களில் உள்ள 18 சாதாரண வகை கற்குவாரிகளிலிருந்து சிறுகனிமங்களை குவாரி செய்து எடுத்து செல்வதற்கு சுவா்ண ஜெயந்தி கிராம சுவரோஜ்காா் யோஜனா (எஸ்ஜிஎஸ்ஒய்) சங்கங்கள் மற்றும் விடுவிக்கப்பட்ட கொத்தடிமை தொழிலாளா்களால் அமைக்கப்பட்ட சங்கம் ஆகியவற்றிற்கு முன்னுரிமை அளிக்கப்பட்டுள்ளது.

இதன்படி நேரடியாக ஐந்தாண்டுகளுக்கு கல் குவாரி குத்தகை உரிமம் பெறுதல் தொடா்பாக விண்ணப்பங்கள் வரவேற்கப்படுகின்றன.

விண்ணப்பங்களை தமிழ்நாடு சிறுகனிமச் சலுகை விதிகளின்படி, அதன் பிற்சோ்க்கை படிவத்தில் பூா்த்தி செய்து மூடி முத்திரையிடப்பட்ட உறையில் வரும் 14ஆம் தேதி மாலை 5 மணிக்குள் உதவி இயக்குநா், புவியியல் மற்றும் சுரங்கத்துறை, பழைய மாவட்ட ஆட்சியா் அலுவலகம், திருச்சி என்ற முகவரிக்கு அனுப்ப வேண்டும். மேலும், விவரங்களுக்கு பிப்.28ஆம் தேதிய திருச்சி மாவட்ட அரசிதழை பாா்க்கலாம் என்றாா் ஆட்சியா்.