நவலூா் குட்டப்பட்டில் ‘உங்களைத் தேடி உங்கள் ஊரில்’ திட்ட முகாம் தொடக்கம்

திருச்சியை அடுத்த நவலூா் குட்டப்பட்டு கிராமத்தில் புதன்கிழமை தொடங்கிய உங்களைத் தேடி உங்கள் ஊரில் திட்ட முகாமில் ஆட்சியா் உள்ளிட்ட அனைத்து அலுவலா்களும் ஒருநாள் தங்கியிருந்து கள ஆய்வு மற்றும் மக்கள் குறைகளை கேட்டு தீா்வு காண்கின்றனா்.

இதையொட்டி கிராமத்தில் உள்ள அங்கன்வாடி மையத்தை பாா்வையிட்ட ஆட்சியா், குழந்தைகளுக்கு வழங்கப்படும் ஊட்டச்சத்து உணவுகள், முன்பருவக் கல்வி முறைகளின் செயல்பாடுகளை ஆய்வு செய்தாா். பின்னா் அன்பில் தா்மலிங்கம் வேளாண்மைக் கல்லூரி, மகளிா் தோட்டக்கலைக் கல்லூரி ஆகியவற்றை பாா்வையிட்டு அவற்றின் செயல்பாடுகளைக் கேட்டறிந்தாா்.

முன்னதாக கோமாரி நோய் தடுப்பூசி முகாமைத் தொடங்கி வைத்து, கலைஞரின் கனவு இல்லத் திட்டத்தில் கட்டப்படும் வீடுகள், மற்றும் வளா்ச்சித் திட்ட கட்டுமானங்களையும் பாா்வையிட்டாா். நவலூா் குட்டப்பட்டு துணை சுகாதார நிலையம், நியாய விலைக் கடைகளிலும் ஆய்வு செய்தாா். பொதுமக்களின் கோரிக்கை மனுக்கள் மீதான நடவடிக்கைகள் குறித்து ஆய்வு செய்து, உடனடித் தீா்வுகளையும் வழங்கினாா்.