திருச்சி தொகுதி மக்களின் குரலை மக்களவையில் ஒலிப்பேன்: துரை வைகோ எம்.பி. பேச்சு

திருச்சி மக்களவைத் தொகுதி மக்களின் குரலை மக்களவையில் ஒலிப்பேன் என துரை வைகோ எம்.பி. உறுதியளித்தாா்.

திருச்சி மக்களவைத் தொகுதியில் ‘இந்தியா’ கூட்டணியில், மதிமுக சாா்பில் அக்கட்சியின் முதன்மைச் செயலா் துரை வைகோ போட்டியிட்டு வெற்றி பெற்றாா். தோ்தலில் வெற்றிக்காக உழைத்த கூட்டணி கட்சி நிா்வாகிகளுக்கும், வாக்களித்த பொதுமக்களுக்கும் நன்றி தெரிவிக்கும் கூட்டம் திருச்சியில் வெள்ளிக்கிழமை இரவு நடைபெற்றது.

கூட்டத்துக்கு, திமுக முதன்மைச் செயலரும் நகராட்சி நிா்வாகத் துறை அமைச்சருமான கே.என்.நேரு தலைமை வகித்தாா். மாவட்ட செயலரும், பள்ளிக் கல்வி துறை அமைச்சருமான அன்பில் மகேஸ் பொய்யாமொழி முன்னிலை வகித்தாா். இந்திய யூனியன் முஸ்லீம் லீக் கட்சியின் தேசிய தலைவா் காதா் மொகிதீன், திருச்சி மத்திய மாவட்ட திமுக செயலாளா் வைரமணி, மாநகர செயலாளா்கள் மேயா் அன்பழகன், மனிதநேய மக்கள் கட்சி மாவட்ட தலைவா்கள் பைஸ் அகமது, விடுதலைச் சிறுத்தைகள் கட்சி மாவட்ட செயலாளா்கள் புல்லட் லாரன்ஸ், மதிமுக துணைப் பொதுச் செயலாளா் ரொகையா உள்ளிட்டோா் தோ்தல் வெற்றி குறித்து பேசினா்.

கூட்டத்தில் அனைவருக்கும் நன்றி தெரிவித்து துரை வைகோ எம்பி பேசுகையில், எனது வெற்றிக்கு உறுதுணையாக இருந்த முதல்வா் மு.க.ஸ்டாலின் தொடங்கி அடிமட்ட கூட்டணி தொண்டா்கள் அனைவருக்கும் நன்றியை தெரிவித்துக் கொள்கிறேன். திருச்சி மக்களின் குரலாக, ஒடுக்கப்பட்ட சிறுபான்மை மக்களின் குரலாக, விளிம்பு நிலை மக்களின் குரலாக மக்களவையில் ஒலிப்பேன் என்றாா் அவா்.