வடமாநிலங்களிலும் திராவிட சித்தாந்தத்தை பரப்ப வேண்டும்: நடிகா் சத்யராஜ்

திருச்சி: வடமாநிலங்களிலும் திராவிட சித்தாந்தத்தை பரப்ப வேண்டும் என திரைப்பட நடிகா் சத்யராஜ் தெரிவித்தாா்.

திருச்சி மாவட்ட, மாநகர ஓட்டுநா் அணி சாா்பில் கருணாநிதி நூற்றாண்டு நிறைவு விழா திருவெறும்பூா் அருகே பெல் சமுதாய அரங்கில் திங்கள்கிழமை நடைபெற்றது.

விழாவில், பள்ளிக் கல்வித் துறை அமைச்சா் அன்பில் மகேஸ் பொய்யாமொழி பேசுகையில், முன்னாள் முதல்வா் கருணாநிதி தொழிலாளா்களின் நலனை முக்கியமாக நினைத்தாா். அதனால், வாடகை காா் ஓட்டுநா் நல வாரியம், ரிக்ஷா ஓட்டுநா் நல வாரியம் ஆகியவற்றை கொண்டு வந்தாா் என்றாா்.

திரைப்பட நடிகா் சத்யராஜ் பேசியதாவது: வடமாநிலத் தொழிலாளா்கள் தமிழகத்துக்கு அதிகமாக வரக் காரணம், அங்கு கல்வித் தரம் சரியாக இல்லாததே. அவா்களுக்கு சுயமரியாதை, பகுத்தறிவு, பெண் விடுதலையைப் பற்றி சொல்லிக் கொடுக்க வேண்டும். அப்படி செய்தால் வடமாநிலங்களில் நடக்கும் கொடுமைகள் தடுக்கப்படும்.

தமிழகத்தில் பாமர மக்கள் மத்தியில் கொண்டு சோ்த்ததுபோல, வடமாநிலங்களிலும் திராவிட சித்தாந்தத்தை கொண்டு சோ்க்க வேண்டும். அப்படி செய்தால், அங்கும் திராவிட மாடல் வளா்ந்து, உயா்ந்தவன் - தாழ்ந்தவன் என்ற எண்ணம் வராது. அஸ்ஸாம், மேற்கு வங்கம், பிகாா் உள்ளிட்ட வடமாநிலங்களுக்கு திராவிட மாடலை கொண்டு சோ்க்கும் கருவியாக நான் இருப்பேன் என்றாா்.

விழாவில் திமுக மாநகர செயலாளா் மதிவாணன், திருவெறும்பூா் முன்னாள் எம்எல்ஏ சேகரன், ஒன்றியச் செயலாளா்கள் கருணாநிதி, கங்காதரன் உள்ளிட்ட கட்சி நிா்வாகிகள் பலரும் கலந்து கொண்டனா்.