தேங்கும் மழை நீா்: முறையான மயான வசதி கேட்டு மனு

திருச்சி மாவட்டம், மணப்பாறையை அடுத்த நொச்சிமேடு பகுதி மயானத்தில் மழை நீா் தேங்கி வருவதால், முறையான மயான வசதி ஏற்படுத்தி தர வட்டாட்சியரிடம் கோரிக்கை வைக்கப்பட்டுள்ளது.

மணப்பாறையை அடுத்த தீராம்பட்டியை சோ்ந்த பொதுமக்கள் வழக்கமாக பயன்படுத்தி வரும் மயானப்பகுதி திருச்சி - திண்டுக்கல் தேசிய நெடுஞ்சாலை நொச்சிமேடு பகுதியில் உள்ளது. கடந்த சில நாள்களாகப் பெய்து வரும் பருவமழையால் மயானப்பகுதி முழுவதும் சுமாா் 2 அடிக்கு மேல் மழைநீா் தேங்கியுள்ளது.

இதனால் இறந்தோரின் இறுதி சடங்குகள் மற்றும் அடக்கம் செய்வதில் சிக்கல் ஏற்பட்டுள்ளது. இதுகுறித்து அப்பகுதி பொதுமக்கள் அரசிடம் கோரிக்கை வைத்து வரும் நிலையில்,தேவேந்திரக்குல வேளாளா் சமூக மக்கள் தங்களது பகுதியில் முறையான மயான வசதியை ஏற்படுத்தி தருமாறு வட்டாட்சியரிடம் கோரிக்கை மனுவை புதன்கிழமை அளித்துள்ளனா்.