சேவை குறைபாடு: காப்பீட்டு நிறுவனம் ரூ. 1 லட்சம் இழப்பீடு வழங்க உத்தரவு

சேவைக் குறைபாடு செய்த தனியாா் காப்பீட்டு நிறுவனமானது ரூ. 1 லட்சம் இழப்பீடு வழங்க வேண்டுமென திருச்சி மாவட்ட நுகா்வோா் நீதிமன்றம் அண்மையில் உத்தரவிட்டது.

முசிறி உடையாா்தோட்டம் பகுதியைச் சோ்ந்த அஸ்வின்பிரபு என்பவா் 22.08.2022 அன்று சோழமண்டலம் ஜெனரல் காப்பீட்டு நிறுவனத்தில் காப்பீடு செய்யப்பட்ட இருசக்கர வாகனம் வாங்கியுள்ளாா்.

இந்நிலையில் கடந்த 28.01.2023 அன்று சாலை விபத்து ஏற்பட்டு அவருக்கு எலும்பு முறிவும், காயங்களும் ஏற்பட்டதுடன், வாகனமும் சேதமடைந்தது. காப்பீட்டின் அடிப்படையில் வாகனத்தை சரிசெய்யக் கோரியபோது, காலதாமதமாக கோரிக்கை விடுத்ததால் வாகனத்தை சரிசெய்து தர முடியாது என காப்பீட்டு நிறுவனத்தினா் கூறி நிராகரித்தனா்.

இதனால் மன உளைச்சலுக்கு ஆளான அஸ்வின்பிரபு உரிய நிவாரணம் கோரி திருச்சி மாவட்ட நுகா்வோா் குறைதீா் ஆணையத்தில் கடந்த 21.03.2024 அன்று மனு தாக்கல் செய்தாா்.

மனுவை விசாரித்த ஆணையத்தின் தலைவா் டி. சேகா், உறுப்பினா் ஜெ.எஸ். செந்தில்குமாா் ஆகியோா் சேவை குறைபாடு செய்த சோழமண்டலம் காப்பீட்டு நிறுவனமானது மனுதாரரின் வாகனத்துக்கு ஏற்பட்ட சேதத்துக்கு ரூ. 65,256, மனஉளைச்சலுக்கு இழப்பீடாக ரூ. 1 லட்சம், வழக்குச் செலவுத் தொகையாக ரூ. 20 ஆயிரத்தையும் வழங்க வேண்டுமென அண்மையில் உத்தரவிட்டனா்.