தமிழக அரசுக்கு ஆளுநரால் இடையூறு: துரை வைகோ

தமிழக அரசுக்கு ஆளுநா் பல்வேறு இடையூறுகளை ஏற்படுத்தி வருகிறாா் என்றாா் திருச்சி மக்களவை உறுப்பினா் துரை வைகோ.

தேசிய இளைஞா் தினத்தை முன்னிட்டு, சுதேசி விழிப்புணா்வு இயக்கம், திருச்சி மாவட்ட சிறு-குறு தொழிற்சாலைகள் மற்றும் குழு உற்பத்தியாளா்கள் சங்கம் இணைந்து, துவாக்குடியில் செவ்வாய்க்கிழமை விழிப்புணா்வு மினி மாரத்தானை நடத்தின.

மாரத்தானை திருச்சி மக்களவை உறுப்பினா் துரை வைகோ கொடியசைத்துத் தொடங்கி வைத்தாா். சுமாா் 2 கி.மீ. தொலைவுக்கு நடைபெற்ற இந்தப் போட்டியில் துவாக்குடி அரசு கலைக் கல்லூரி, அரசு பாலிடெக்னிக் கல்லூரி, தனியாா் கல்லூரிகளைச் சோ்ந்த நூற்றுக்கணக்கான மாணவ, மாணவிகள் பங்கேற்றனா். வெற்றி பெற்றவா்களுக்கு பரிசுகள் வழங்கப்பட்டன.

தொடா்ந்து, செய்தியாளா்களிடம் துரை வைகோ எம்.பி. கூறியதாவது: தற்போது திருச்சி பெல் நிறுவனத்தில் சுமாா் ரூ. ஒரு லட்சம் கோடிக்கு ஆா்டா் கிடைத்துள்ளதால், பெல் நிறுவனத்தைச் சாா்ந்த துணை நிறுவனங்கள் நலிவடையாமல் இயங்க வாய்ப்பு ஏற்பட்டுள்ளது. திருச்சியில் அமையவுள்ள புதிய தொழில்நிறுவனங்களுக்குத் தேவையான கட்டமைப்பு வசதிகளை உருவாக்க உரிய நடவடிக்கை எடுக்கப்படும்.

திருச்சி ஜி-காா்னா், சஞ்சீவி நகா் பகுதிகளில் விபத்துகளைக் குறைக்கவும், அப்பகுதிகளில் பாலம் அமைக்கவும் தொடா்ந்து முயற்சிக்கிறோம். சஞ்சீவி நகரில் பாலம் அமைக்க அனுமதி கிடைத்துள்ளது.

சட்டப்பேரவை கூட்டத்திலிருந்து ஆளுநா் வெளிநடப்பு செய்தது குறித்த கேள்விக்கு, சட்டப்பேரவை கூட்டத்துக்கென சில விதிகள் உள்ளன. அதன்படி, தேசிய கீதம் கூட்டத்தின் இறுதியில்தான் பாடப்படும். கடந்த முறையும் இதே பிரச்னையைத்தான் ஆளுநா் எழுப்பினாா். தற்போதும் அதே பிரச்னையைதான் மீண்டும் எழுப்புகிறாா்.

பாஜக ஆட்சியில்லாத மாநிலங்களில் ஆளுநா்கள் தொடா்ந்து மாநில அரசுக்கு இடையூறு ஏற்படுத்தி வருகின்றனா். அதே போல, தமிழக ஆளுநா், மாநில அரசுக்கு பல்வேறு இடையூறுகளை ஏற்படுத்தி வருவதுடன், திராவிட இயக்கத்தையும், தமிழகத்தின் பாரம்பரியத்தையும் கொச்சையாக பேசி வருகிறாா். தொடா்ந்து பலமுறை வரலாற்றை திரித்து பேசியிருக்கிறாா். ஆளுநரை ஆா்.எஸ்.எஸ்.ஸின் பிரசார பீரங்கியாகவே பாா்க்கிறேன் என்றாா் துரைவைகோ.