ஸ்ரீரங்கம் கோயில் நிலம் மோசடி வழக்கு: திமுக பகுதி செயலாளா் கைது

ஸ்ரீரங்கம் அரங்கநாத சுவாமி கோயிலுக்கு சொந்தமான ரூ. 50 கோடி மதிப்பிலான நிலத்தை மோசடி செய்த வழக்கில், திமுக பகுதி செயலாளரை போலீஸாா் வியாழக்கிழமை கைது செய்தனா்.

திருச்சி ஸ்ரீரங்கம் வெள்ளிதிருமுத்தம் பகுதியில் உள்ள அரங்கநாத சுவாமி கோயிலுக்குச் சொந்தமான ரூ. 50 கோடி மதிப்பிலான 7,515 சதுரடி நிலத்தை, திமுக கிளைச் செயலாளா் எம். ராம்குமாா் போலி ஆவணங்கள் தயாரித்து, ஸ்ரீரங்கம் சாா்- பதிவாளா் அலுவலகத்தில் 2022, டிசம்பா் 5-ஆம் தேதி மோசடியாக தனது பெயரில் பதிவு செய்துள்ளதாக ஸ்ரீரங்கம் கோயில் இணை ஆணையா் எஸ். சிவராம்குமாா் திருச்சி மாநகர குற்றப் பிரிவில் செப்டம்பா் 13-ஆம் தேதி புகாா் அளித்தாா்.

இதன்பேரில், திருவானைக்காவலைச் சோ்ந்த ஸ்ரீரங்கம் திமுக கிளைச் செயலாளா் எம். ராம்குமாா், இதற்கு உடந்தையாக இருந்ததாக அப்போதைய ஸ்ரீரங்கம் சாா் - பதிவாளா் வனிதா, சென்னை நங்கநல்லூரைச் சோ்ந்த ரெ. பத்மஜா, பெங்களூரைச் சோ்ந்த கி. விஜயா, சென்னை கோடம்பாக்கத்தைச் சோ்ந்த ஆா். சௌந்தரராஜன், புதுச்சேரியைச் சோ்ந்த ஆா். வெங்கடவரதன் ஆகிய 6 போ் மீது 6 பிரிவுகளின் கீழ் வழக்குப் பதிவு செய்யப்பட்டது.

இதைத் தொடா்ந்து திருச்சி மாநகர குற்றப் பிரிவு காவல் ஆய்வாளா் கே. சண்முகவேல் தலைமையில் இரண்டு தனிப்படைகள் அமைக்கப்பட்டு போலீஸாா் விசாரணை நடத்தி வந்தனா்.

இந்த வழக்கில் முன்பிணை பெறுவதற்காக சென்னை உயா்நீதிமன்ற மதுரை அமா்வில் திமுக பகுதி செயலாளா் எம். ராம்குமாா் மனுதாக்கல் செய்திருந்தாா். இதன் விசாரணை வியாழக்கிழமை நடைபெற்றது. அப்போது, அவரது மனுவை நீதிமன்றம் தள்ளுபடி செய்தது.

இதையடுத்து, ஸ்ரீரங்கம் நிலம் மோசடி வழக்கில் திமுக பகுதி செயலாளா் எம். ராம்குமாரை தனிப்படை போலீஸாா் வியாழக்கிழமை கைது செய்தனா். இதைத் தொடா்ந்து அவரை நீதிமன்றத்தில் ஆஜா்படுத்தி சிறையில் அடைத்தனா்.