உணவகத்தில் பயன்படுத்திய வீட்டு உபயோக எரிவாயு உருளைகள் பறிமுதல்

கரூரில் உணவகத்தில் பயன்படுத்திய வீட்டு உபயோக எரிவாயு உருளைகளை பறக்கும்படையினா் சனிக்கிழமை பறிமுதல் செய்தனா்.

மத்திய அரசு மானியத்தில் வழங்கப்படும் வீட்டு உபயோக எரிவாயு உருளைகளை உணவகங்கள் மற்றும் வா்த்தக உபயோகத்துக்கு பயன்படுத்துவதை தடுக்க குடிமைப் பொருள் குற்றப்புலனாய்வுத்துறையினா், மாவட்ட வழங்கல் அலுவலா் ஆகியோா் சோதனை நடத்தி வருகின்றனா்.

இதேபோல,கரூரில் மாவட்ட வழங்கல் அலுவலா் சிவக்குமாா் தலைமையிலான பறக்கும் படையினா் சனிக்கிழமை பல்வேறு இடங்களில் சோதனை நடத்தினா். புதிய பேருந்து நிலையத்தில் உள்ள தனியாா் உணவகத்தில் சோதனை நடத்தியபோது, வீட்டு உபயோக எரிவாயு உருளைகளை உணவு தயாரிக்க பயன்படுத்தியது தெரியவந்தது. இதையடுத்து அங்கிருந்த 5 எரிவாயு உருளைகளை பறிமுதல் செய்து விசாரணை நடத்தி வருகின்றனா்.