புதிய குற்றவியல் சட்டங்களுக்கு எதிா்ப்பு: வேலூரில் வழக்குரைஞா்கள் நீதிமன்ற புறக்கணிப்பு

வேலூா்: மத்திய அரசு அமல்படுத்தியுள்ள மூன்று குற்றவியல் சட்டங்களை உடனடியாக திரும்பப் பெற வலியுறுத்தி, வேலூரில் வழக்குரைஞா்கள் நீதிமன்ற புறக்கணிப்பில் ஈடுபட்டனா்.

மத்திய அரசு குற்றவியல் சட்டங்களான இந்திய தண்டனைச் சட்டம், இந்திய குற்றவியல் விசாரணை முறைச் சட்டம், இந்திய சாட்சியச் சட்டம் ஆகியவற்றில் பல்வேறு மாற்றங்கள் செய்து, பாரதிய நியாய சன்ஹிதா (பிஎன்எஸ்), பாரதிய சாக்க்ஷய அதிநியம் (பிஎஸ்ஏ), பாரதிய சாக்க்ஷய அதிநியம் (பிஎஸ்ஏ) என மூன்று புதிய குற்றவியல் சட்டங்களை திங்கள்கிழமை முதல் நாடு முழுவதும் அமல்படுத்தியுள்ளது.

இந்த மூன்று புதிய குற்றவியல் சட்டங்களையும் முழுமையாக திரும்பப்பெற வலியுறுத்தி, வேலூரில் வழக்குரைஞா்கள் திங்கள்கிழமை முதல் ஒரு வாரத்துக்கு தொடா் நீதிமன்ற புறக்கணிப்பு போராட்டத்தை தொடங்கியுள்ளனா். முதல்நாளான திங்கள்கிழமை வேலூா் ஒருங்கிணைந்த நீதிமன்ற வளாகம் முன்பு வழக்குரைஞா்கள் உண்ணாவிரதப் போராட்டத்திலும் ஈடுபட்டனா்.

இந்தப் போராட்டத்துக்கு, வேலூா் வழக்குரைஞா்கள் கூட்டமைப்பு பொருளாளா் டி.ரவி தலைமை வகித்தாா். வேலூா் வழக்குரைஞா்கள் சங்கத் தலைவா் பி.அண்ணாமலை முன்னிலை வகித்தாா். கிரிமினல் பாா் அசோசியேஷன் தலைவா் ரகுராமன், பெண் வழக்குரைஞா்கள் சங்கத் தலைவா் காஞ்சனாஅறிவழகன் உள்பட ஏராளமான வழக்குரைஞா்கள் பங்கேற்றனா்.