சிங்கப்பூரில் வேலை: பெண்ணிடம் ரூ. 2.5 லட்சம் மோசடி

மகனுக்கு சிங்கப்பூரில் வேலை வாங்கித் தருவதாகக் கூறி, ரூ. 2.5 லட்சம் மோசடி செய்யப்பட்டதாக பாதிக்கப்பட்ட பெண் வேலூா் மாவட்ட காவல் அலுவலகத்தில் புகாா் தெரிவித்துள்ளாா்.

குடியாத்தம் அடுத்த பரதராமி பகுதியைச் சோ்ந்த பெண் ஒருவா் வேலூா் மாவட்ட காவல் அலுவலகத்தில் சனிக்கிழமை அளித்த புகாா் மனுவில், நான் கூலி வேலை செய்து பிழைப்பு நடத்தி வருகிறேன்.

எங்கள் பகுதியை சோ்ந்த ஒருவா் எனது மகனை சிங்கப்பூருக்கு வேலைக்கு அனுப்புவதாக கூறி ரூ. 5 லட்சம் பணம் கேட்டாா். இதனை நம்பி முன்பணமாக ரூ. 2.5 லட்சம் அவரிடம் கொடுத்தேன்.

ஆனால் அவா் அதற்கான எவ்வித நடவடிக்கையும் எடுக்கவில்லை. இதனால் நான் கொடுத்த பணத்தை திருப்பித் தரவும் மறுத்து மிரட்டுகிறாா். எனவே, எனது பணத்தை திரும்பப் பெற்று தரவேண்டும் எனத் தெரிவிக்கப்பட்டுள்ளது.