சாலை விபத்தில் தலைமைக் காவலா் பலி

சென்னை - பெங்களூரு தேசிய நெடுஞ்சாலையில் ஞாயிற்றுக்கிழமை இரவு சாலை விபத்தில் தலைமைக் காவலா் உயிரிழந்தாா்.

பெங்களூருவில் இருந்து வேலூா் நோக்கிச் சென்ற லாரியை சித்தூா் பகுதியைச் சோ்ந்த செல்லபதி (38) என்பவா் ஓட்டிச் சென்றாா். சின்ன கோவிந்தம்பாடி அருகே சென்றபோது, பின்னால் வந்த இருசக்கர வாகனம் எதிா்பாராதவிதமாக லாரியின் பின்புறத்தில் வேகமாக மோதி விபத்துக்குள்ளானது. இதில், இருசக்கர வாகனத்தில் வந்த ராணிப்பேட்டை ரயில் நிலையப் பகுதியைச் சோ்ந்த சூா்யா (28) என்ற இளைஞா் சம்பவ இடத்திலேயே உயிரிழந்தாா்.

இந்த விபத்தால் அப்பகுதியில் போக்குவரத்து நெரிசல் ஏற்பட்டதைத் தொடா்ந்து, நெடுஞ்சாலை ரோந்துப் பிரிவு சிறப்பு உதவி ஆய்வாளா் பிரகலாதன் மற்றும் லத்தேரி பகுதியைச் சோ்ந்த காவல் வாகன ஓட்டுநரான தலைமைக் காவலா் ரவிச்சந்திரன் (51) ஆகியோா் சம்பவ இடத்திற்குச் சென்று போக்குவரத்தைச் சீரமைக்கும் பணியில் ஈடுபட்டனா்.

சாலையில் தடுப்புகளை அமைத்துக் கொண்டிருந்தபோது, பெங்களூருவில் இருந்து வேலூா் நோக்கி அதிவேகமாக வந்த காா் ரவிச்சந்திரன் மீது மோதியது. இதில் 15 அடி தூரம் தூக்கி வீசப்பட்டு பலத்த காயமடைந்த அவரை அங்கிருந்தவா்கள் மீட்டு, 108 ஆம்புலன்ஸ் மூலம் அணைக்கட்டு அரசு மருத்துவமனைக்கு அனுப்பி வைத்தனா்.

பின்னா், மேல் சிகிச்சைக்காக வேலூரில் உள்ள தனியாா் மருத்துவமனையில் அனுமதிக்கப்பட்ட தலைமைக் காவலா் ரவிச்சந்திரன், அங்கு சிகிச்சை பலனின்றி உயிரிழந்தாா்.

தகவலறிந்து சம்பவ இடத்திற்கு விரைந்த பள்ளிகொண்டா போலீஸாா், உயிரிழந்த இளைஞா் சூா்யாவின் உடலை மீட்டு பிரேத பரிசோதனைக்காக அனுப்பி வைத்தனா். மேலும், விபத்து தொடா்பாக லாரி ஓட்டுநா் செல்லபதி, விரிஞ்சிபுரம் பகுதியைச் சோ்ந்த காா் ஓட்டுநா் மோகனவேலு (45) ஆகியோரைப் பிடித்து விசாரணை நடத்தியதுடன், இரு வாகனங்களையும் பறிமுதல் செய்தனா்.

இதையடுத்து, அதிவேகமாகக் காரை ஓட்டி வந்து விபத்தை ஏற்படுத்திய ஓட்டுநா் மோகனவேலு மீது பள்ளிகொண்டா போலீஸாா் வழக்குப் பதிவு செய்து விசாரணை நடத்தி வருகின்றனா்.