ஆட்சியரிடம் திமுகவினா் கோரிக்கை மனு அளிப்பு

விழுப்புரம்: ஃபென்ஜால் புயலால் பாதிக்கப்பட்ட விழுப்புரம் மாவட்டத்தைச் சோ்ந்த அனைத்து குடும்ப அட்டைதாரா்களுக்கும் நிவாரணம் வழங்க நடவடிக்கை எடுக்க வேண்டும் என்று ஆட்சியரிடம் திமுகவினா் திங்கள்கிழமை வலியுறுத்தினா்.

விழுப்புரம் மாவட்டப் பகுதிகளில் வருவாய்த் துறையினா் மூலம் ரூ.2 ஆயிரம், அரிசி உள்ளிட்ட நிவாரண உதவிகள் வழங்கப்பட்டு வருகின்றன. இந்த நிலையில், புயலால் பாதிக்கப்பட்ட மக்கள் அனைவருக்கும் நிவாரண உதவிகளை வழங்க நடவடிக்கை எடுக்க வேண்டும் என்று திமுக விழுப்புரம் மாவட்டப் பொறுப்பாளா் பொன்.கௌதமசிகாமணி, திமுக மாவட்ட அவைத் தலைவா் ம.ஜெயச்சந்திரன், மாவட்டப் பொருளாளா் இரா.ஜனகராஜ், விழுப்புரம் நகரச்செயலா் இரா.சா்க்கரை உள்ளிட்டோா் ஆட்சியா் சி.பழனியை திங்கள்கிழமை சந்தித்து கோரிக்கை மனு அளித்தனா்.

மனுவைப் பெற்றுக் கொண்ட ஆட்சியா் மாவட்டத்தில் மொத்தம் 5.25 லட்சம் குடும்ப அட்டைதாரா்களுக்கு நிவாரணம் வழங்குவதற்கான நடவடிக்கை எடுக்கப்பட்டுள்ளது என்றாா்.

கட்சி சாா்பில் நிவாரண உதவிகள்: விழுப்புரம் நகராட்சிக்குள்பட்ட 18-ஆவது வாா்டு பகுதியைச் சோ்ந்த 150 பேருக்கு கட்சியின் சாா்பில் அரிசி, மளிகைப் பொருள்கள், காய்கறிகள் அடங்கிய தொகுப்பை பொன்.கௌதமசிகாமணி வழங்கினாா்.

நிகழ்வில், விழுப்புரம் நகா்மன்றத் தலைவா் தமிழ்செல்வி பிரபு, நகா்மன்ற உறுப்பினா் சசிரேகா பிரபு, திமுக வாா்டு செயலா் பிரபு ஆகியோா் கலந்துகொண்டனா்.