கடலூர் சிறைச்சாலையில் அங்காடி திறக்கும் பணி: ஏடிஜிபி ஆய்வு

கடலூர் கிளைச்சிறையில் சிறையில் உற்பத்தியாகும் பொருள்களை விற்பதற்கு அங்காடி அமைப்பதற்கான பணிகளை சிறைத்துறை ஏடிஜிபி திரிபாதி வெள்ளிக்கிழமை ஆய்வு செய்தார்.

தமிழக சிறைகளில் நன்னடத்தை கைதிகள் உற்பத்தி செய்யும் கைவினைப் பொருள்கள், உணவுப் பொருள்கள் அந்தந்த சிறைகளின் முன்பாக சிறைத் துறையால் அங்காடிகள் அமைத்து, அதன் மூலமாக விற்பனை செய்யப்பட்டு வருகின்றன. இது பொதுமக்கள் மத்தியில் நல்ல வரவேற்பை பெற்றுள்ளது.

இதேபோல், கடலூர் மத்திய சிறைக்குள்ளிருக்கும் கைதிகள் இனிப்பு, கார வகைகள் தயாரித்து விற்பனை செய்கின்றனர். மத்திய சிறையானது ஊருக்கு ஒதுக்குபுறமாக இருப்பதால் பொதுமக்களால் எளிதில் சென்று வர முடியவில்லை.

எனவே நகரின் மையப்பகுதியில் கடலூர் பழைய மாவட்ட ஆட்சியரகம் அருகே உள்ள கிளைச்சிறையில் அங்காடி தொடங்க சிறைத்துறை திட்டமிட்டது. இந்நிலையில், கடலூர் மத்திய சிறையில் நடைபெற்று வரும் கட்டுமானப்பணிகளை சிறைத் துறை ஏடிஜிபி திரிபாதி வெள்ளிக்கிழமை ஆய்வு செய்தார். அதனைத் தொடர்ந்து சிறை அங்காடித் திட்டம் தொடர்பாக கடலூர் கிளைச்சிறையை ஆய்வு செய்தார்.

அப்போது அவர் கூறுகையில், இந்த ஆய்வுப்பணியானது வழக்கமான ஆய்வுதான். விரைவில் கடலூர் கிளைச்சிறையில் அங்காடி தொடங்க நடவடிக்கை எடுக்கப்படும் என்றார். கடலூர் மத்திய சிறை கண்காணிப்பாளர் (பொறுப்பு) அ.ஆண்டாள் உடனிருந்தார்.