டின உழைப்பே மாணவர்களுக்கு வெற்றியை தரும்

கடின உழைப்பே மாணவர்களுக்கு வெற்றியைத் தரும் என ஜவஹர் கல்லூரி பட்டமளிப்பு விழாவில் என்எல்சி இந்தியா நிறுவனத் தலைவர் சரத்குமார் ஆச்சார்யா கூறினார். 
என்எல்சி இந்தியா நிறுவனத்தால் ஜவஹர் கல்விக் கழகத்தின் கீழ் ஜவஹர் அறிவியல் கல்லூரி இயங்கி வருகிறது. இந்தக் கல்லூரியின் 11-ஆவது பட்டமளிப்பு விழா புதிய கலையரங்கில் ஞாயிற்றுக்கிழமை நடைபெற்றது.
நிகழ்ச்சியில் சிறப்பு விருந்தினராகக் கலந்துகொண்ட ஜவஹர் கல்விக் கழகத்தின் தலைமைப் புரவலரும், என்எல்சி இந்தியா நிறுவன தலைவருமான சரத்குமார் ஆச்சார்யா, 2016-17-ஆம் கல்வியாண்டில் தேர்ச்சி பெற்ற 266 இளங்கலை மற்றும் முதுகலை மாணவர்களுக்கு பட்டங்களை வழங்கினார். பின்னர் சரத்குமார் ஆச்சார்யா பேசியதாவது: 
வெற்றி என்பது அதிருஷ்டத்தால் வருவதல்ல. ஒருவரது கடின உழைப்பே வெற்றியைத் தரும். பட்டம் பெற்ற மாணவர்கள் வாழ்க்கையிலும் வெற்றி பெற தோல்விகளைக் கண்டு மனம் தளராது கடின உழைப்பைத் தொடரவேண்டும். நாட்டுக்கு பெருமை சேர்க்கும் வகையில் சிறந்த குடிமகனாக திகழ்ந்து சாதனை படைக்க வேண்டும் என்றார் அவர். விழாவுக்கு என்எல்சி இந்தியா நிறுவன மனித வளத் துறை இயக்குநர் ஆர்.விக்ரமன் தலைமை வகித்துப் பேசினார். விழாவில், நிலயியல் மற்றும் சுற்றுச்சூழல் மேலாண்மை துறைகளில் திருவள்ளுவர் பல்கலைக்கழக அளவில் முதலிடம் பெற்ற கமலி, சசிபிரியன் ஆகியோருக்கு பதக்கம், கேடயம் வழங்கப்பட்டன. கல்லூரியில் சிறந்து விளங்கும் மாணவர்களுக்கு, என்எல்சி முன்னாள் தலைவர் சஹாய் அவர்களின் துணைவியார் நிரஜா சஹாய் நினைவாக விருதுகள், பதக்கங்கள், ரொக்கப் பரிசுகள் வழங்கப்பட்டன. ஒவ்வொரு துறையிலும் சிறப்பாக செயல்பட்ட மாணவர்களுக்கு சான்றிதழ்கள், பரிசுகள் வழங்கப்பட்டன.
விழாவில், ஜவஹர் கல்விக் கழக துணைத் தலைவர் செந்தில்குமார், செயலர் ரவிச்சந்திரன், ஜவஹர் கல்லூரிச் செயலர் விநாயகமூர்த்தி, கல்லூரி முதல்வர் சந்திரசேகரன் ஆகியோர் பேசினர். 
என்எல்சி இந்தியா நிறுவன நிதித் துறை இயக்குநர் ராக்கேஷ் குமார், திட்டம் மற்றும் செயலாக்கத் துறை இயக்குநர் நாதெள்ள நாகமகேஸ்வர் ராவ் உள்ளிட்டோர் கலந்து கொண்டனர்.