அதிமுக பிரமுகர் கொலை வழக்கு: மேலும் ஒருவர் தடுப்புக் காவலில் கைது

கடலூர் அருகே உள்ள தேவனாம்பட்டினம் கிராமத்தினருக்கும், சோனங்குப்பம் கிராமத்தினருக்கும் இடையே கடலில் மீன் பிடிக்கப் பயன்படுத்தும் வலை தொடர்பாக அண்மையில் தகராறு ஏற்பட்டது. அப்போது, சோனங்குப்பத்தைச் சேர்ந்த அதிமுக கிளைச் செயலர் க.பஞ்சநாதன் (64), தேவனாம்பட்டினம் மீனவர்களின் தாக்குதலில் கொல்லப்பட்டார்.
 இதுதொடர்பாக 21 பேர் மீது காவல் துறையினர் வழக்குப் பதிவு செய்து, இதுவரை 15 பேரை கைது செய்துள்ளனர். இவர்களில் 3 பேர் குண்டர் தடுப்புக் காவல் சட்டத்தின் கீழ் கைது செய்யப்பட்டனர்.
 இந்த நிலையில், தாழங்குடாவைச் சேர்ந்த ஒருவரை கத்தியைக் காட்டி மிரட்டிய வழக்கில் கைது செய்யப்பட்ட தேவனாம்பட்டினம் கிருஷ்ணன் மகன் பலராமனுக்கு (32), அதிமுக பிரமுகர் கொலையில் தொடர்பிருப்பது தெரிய வந்தது.
 இதையடுத்து, அவரது குற்றச் செயல்களைக் கட்டுப்படுத்தும் வகையில், குண்டர் தடுப்புக் காவல் சட்டத்தின் கீழ் கைது செய்ய உத்தரவிடக் கோரி, மாவட்ட ஆட்சியருக்கு காவல் கண்காணிப்பாளர் செ.விஜயகுமார் பரிந்துரைத்தார்.
 இதையேற்று, மாவட்ட ஆட்சியர் வே.ப.தண்டபாணி அதற்கான உத்தரவை வழங்கினார். இதையடுத்து, பலராமன் குண்டர் தடுப்புக் காவல் சட்டத்தின் கீழ் கைது செய்யப்பட்டு, புதன்கிழமை கடலூர் மத்திய சிறையில் அடைக்கப்பட்டார்.