வானபுரீஸ்வரர் கோயில் தேர் வெள்ளோட்டம்

கடலூர் அருகே உள்ள திருமாணிக்குழியில் அமைந்துள்ள ஸ்ரீஅம்புஜாட்சி வானபுரீஸ்வரர் கோயில் தேர் வெள்ளோட்டம்  புதன்கிழமை நடைபெற்றது.
 இந்தக் கோயிலுக்கு ரூ.20 லட்சத்தில் புதியதாக திருத்தேர் செய்யப்பட்டது. புதிய திருத்தேரின் வெள்ளோட்டம் புதன்கிழமை காலையில் நடைபெற்றது. முன்னதாக அம்புஜாட்சி வானபுரீஸ்வரருக்கு சிறப்பு அபிஷேகம் செய்யப்பட்டு தீபாராதனை நடைபெற்றது. தொடர்ந்து லட்சுமி ஹோமம், நவக்கிரக ஹோமம், சுதர்சன ஹோமம் ஆகியவை நடத்தப்பட்டு கலச அபிஷேகமும் நடைபெற்றது. கலசத்துக்கு தீபாராதனை செய்து கலசம் கோயிலில் இருந்து புறப்பட்டு கோயிலை சுற்றி பிறகு தேர்மீது வைக்கப்பட்டது. அதன்பின்னர் அலங்கரிக்கப்பட்ட திருத்தேரை பக்தர்கள் வடம்பிடித்து இழுத்தனர். கோயிலின் நான்கு மாட வீதிகளிலும் வலம் வந்த திருத்தேர் பின்னர் நிலையை அடைந்தது.தொடர்ந்து, மகா தீபாராதனை நடத்தப்பட்டு பக்தர்களுக்கு அன்னதானம் வழங்கப்பட்டது.