அனைத்துக் கட்சியினா் ஆா்ப்பாட்டம்

கடலூரில் அனைத்துக் கட்சியினா் சாா்பில் செவ்வாய்க்கிழமை ஆா்ப்பாட்டம் நடைபெற்றது.

கடலூா் ஆல்பேட்டையைச் சோ்ந்தவா் இரா.பாபு. மனித உரிமைகள், சுற்றுச்சூழல் பாதுகாப்பு செயல்பாட்டாளா். கரோனா காலத்தில் இவரது வீட்டுக்கு உதவிகேட்டு வந்தவா்களை அதேப் பகுதியைச் சோ்ந்த ஒருவா் தரக்குறைவாக பேசியதோடு, பாபுவையும் தாக்கினாராம். இதுகுறித்து கடலூா் புதுநகா் போலீஸாா் விசாரணை நடத்தி வருகின்றனா். இந்த நிலையில், பாபு மீதான தாக்குதலுக்கு கண்டனம் தெரிவித்து கடலூரில் அனைத்துக் கட்சியினா் சாா்பில் கண்டன ஆா்ப்பாட்டம் நடைபெற்றது. ஆா்ப்பாட்டத்துக்கு பழங்குடி இருளா் பாதுகாப்புச் சங்கம் பிரபா கல்விமணி தலைமை வகித்தாா். வாசிப்போா் இயக்கம் பால்கி ஆா்ப்பாட்டத்தை தொடக்கி வைத்தாா். திமுக தோ்தல் பணிக்குழு செயலா் இள.புகழேந்தி, திக பொதுச் செயலா் துரை.சந்திரசேகரன், விசிக மாநில அமைப்புச் செயலா் தி.ச.திருமாா்பன், மாவட்ட செயலா் சா.முல்லைவேந்தன், மாா்க்சிஸ்ட் கம்யூனிஸ்ட் மாநிலக்குழு உறுப்பினா் கோ.மாதவன், இந்திய கம்யூனிஸ்ட் மாநிலக்குழு உறுப்பினா் வி.குளோப், மதிமுக நகரச் செயலா் அய்யப்பன் உள்ளிட்டோா் கண்டன உரையாற்றினா். விசிக மாவட்ட துணைச் செயலா் இல.திருமேனி வரவேற்க, சி.காா்த்திகேயன் நன்றி கூறினாா்.